SHILLONG:
Ka Catholic Church of Meghalaya, Shillong, kala phah da ka shithi sha ka National Law Commission ba pynpaw ïa ka jingpyrshah bad jingsngewkhia halor ka jingthmu ka Sorkar Pdeng ban pyntreikam ïa ka Uniform Civil Code (UCC) hapoh ka Ri India.Ha ka shithi sha ka Law Commission, ka Balang kala kdew ïa ka UCC ba ka lah ban ktah ïa ka rukom ngeit, ka riti dustur, bad deity tynrai bad ruh ïa ka kyndon bala pynkupbor kyrpang jong ki paid riewlum.
Ka Balang ka mynjur ïa ka jingdon ki ain shimet ba khmih ïa ka kam ïashongkurim, ïapyllait sanshyieng, ai pateng bad ai bynta ïa ka nongkynti kiba la shong tynrai da ki jingngeit bad rukom leh naduh tynrao. Hynrei, ka jingpynbna ba dang shen jong ka Law Commission ha ka 14 tarik Jylliew, 2023 halor ka jingpyntreikam ïa ka UCC ka dei kaba la sngewkhia jur bha. Ka Balang kala pynpaw ïa ki jingpyrshah halor ka jingpyntreikam ïa ka UCC ha India da kaba kdew ïa ki mat ba kongsan.
Ka Riti Synshar ka Ri India, lyngba ka Article 341, 342 bad ka Sixth Schedule, kala pynkha ïa ki kyndon ba kyrpang ban pynkupbor ïa ki paid riewlum. Ka Balang kala pynpaw ïa ka jingsngewkhia ba ka jingpyntreikam ïa ka UCC ka lah ban pynduh noh ïa kine ki hok ba kyrpang bala ai sha ki dkhot jong ki paid riewlum.
Kumjuh ruh ka General Assembly Presbyterian Church of India ka la pynpaw ïa ka jingsngewkhia halor kane ka juh ka mat bad ong ba kane ka dei ka jingktah matïong ïa ki jinglehniam bad ki kolshor.
Kumta kine ki Balang ki kyntu jur ïa ka tnad ba peit ïa ka ain ban ym pyntreikam ïa ka UCC ha ka ri baroh kawei.
