MAWTHADRAISHAN:
Ki seng bhalang kiba pher bapher jong ka Mawthadraishan Circle kiba dei hapoh ka shatri jong ka Save Hynñiewtrep Mission (SHM), ha ka 6 tarik u Kyllalyngkot ki la mih sha surok ban pyrta ILP bad ban rah baner hadien ba u Myntri Rangbah ka Sorkar jylla u Conrad K Sangma ula wan ban ïuh kjat ha Mawthadraishan ban leit ïashim bynta ha ka jingïalang paidbah jong ka seng National People’s Party Mawthadraishan konstitwensi ha Madan ïalehkai jong ka Shnong Kynshi Bangla EWKHD.
La ong ba ka jingthmu jong kine ki seng bhalang ban pyrta ILP bad ban rah ïa ki placard ka long ban pynpaw sha u Myntri Rangbah ba un pyntrei kam noh ïa ki 9 tylli ki mat kiba kynthup hapoh ka Save Hynñiewtrep Mission kum ka ban dawa ban pyntrei kam noh ïa ka Inner Line Permit ILP ha ka Jylla, ban pynrung noh ïa ka ktien Khasi ha ka Khyrnit kaba phra jong ka synshar ka Ri India, ban pynbeit biang ïa ka MOU halor u pud u sam, ban pynkynriah noh ïa ki Harijan kiba shong ha Them Ïew Mawlong bad kiwei kiwei.
Haba ai jingkren u General Secretary ka seng HYC Mawthadraishan Circle u Bah Shembor Langrin ula ong ba ka jingthmu jong kine ki seng ka long ban dawa ïa ki 9 tylli ki mat kiba donkam na ka bynta ka jaitbynriew baroh kawei.
Hynrei haduh mynta ym pat don ka dak ka shin bad ki la pynpaw ïa ka jingsngewdiaw ba u Conrad Sangma kum u nongïalam ïa ka jylla bad ïa ka sorkar MDA kim pat lah ban leh eiei halor kine ki mat jingdawa hynrei ka seng kan ym shong thait lane kut lad hynrei kan ïai dawa na ka por sha ka por.
