NONGPOH:
Ha ka sngi ba u Narendra Singh Tomar, myntri ka sorkar pdeng bad uba dei peit ïa ka tnad Agriculture & Farmers Welfare, u la leit ban ïuhkjat ha College of Agriculture (COA) kaba don ha Kyrdemkulai, na ka bynta ban leit plie paidbah ïa ka Administrative unit Block, Academic Block bad ka Girls Hostel, ki nongïalam lem bad ki dkhot ka Khasi Student Union bad lem bad na ka seng Ri Bhoi Youth Federation (RBYF), ki la leit ban rah da ki plakad ha khyrdop katei ka COA, kaba long kum ka jingpyrshah halor ka jingkular kai ka sorkar pdeng, namar ia ka jaka kaba la thmu ban tei ïa ka Central Agriculture University, hynrei la pynkylla pynban sha ka College of Agriculture
Ha katei ka sngi kaba kitei ki nongialam ka KSU, ki la leit ban rah plakad hakhmat utei u Myntri sorkar pdeng, la lamkhmat da u Samla Donald V Thabah, General Secretary, u samla Biangbor Paliar, Vice President, u Bah Ferdynald K Kharkamni, President ka KSU, North Khasi Hills District lem bad shibun ki nongïalam ka jong katei ka seng.
Kitei ki nongïalam jong ka KSU, ki la pynpaw ba ka nongrim kaba la pynlong ia ki ba kin leit rah plakad sha katei ka jaka, ka long kum ka jingpyrshah halor ka jingkylla ktien bad shetshukor ki bor ka COA, kiba la pynkylla sha ka College ha ka jaka jong ka Central Agriculture University bad ka jingpyrshah ruh ka dei halor ka jingpynhap sha ka Central Agriculture University, Imphal, ha kaba ka seng kam sngew ïahap satia, namar ka jingshisha hi ka long ba katkum ka jingpynbeit, ka long ba wat ïa ka jaka ruh la dep ban aiti da ka sorkar jylla kaba don kumba 420 akar ha Kyrdemkulai.
U Samla Donald V Thabah, haba kren sha ki lad pathai khubor, u la ong ba ka seng, kam banse ban shim ïa katei ka sienjam ban pyrshah jur halor katei ka jingleit ïuhkjat jong utei u Myntri ka sorkar pdeng ha katei ka jaka, namar ka jingpyrshah jong ka seng ka dei hadien ba ka sorkar pdeng hi kam shem la sngap ne pynurlong ïa ka jingdawa ban pynkylla ïa ka College of Agriculture sha ka University, kaba dei ruh ka mat jingdawa ba ka seng ka la dep ban dawa ha kine ki snem kiba la leit noh baroh, ha kaba wat na ka seng ki la leit ban kynduh ne wat ban phah jingthoh sha utei u Myntri ka sorkar pdeng.
Ka jingpyrshah jong ka seng ka dei ruh halor ka nongrim naduh u snem 2010, ha kaba ka jingthmu ka sorkar pdeng bad ka sorkar jylla ka long ban wanrah beit da ka University ha Kyrdemkulai, hynrei katei kam shym ka urlong satia, namar mynta la shu ai pat tang da ka College, kaba long pyrshah ïa ka jingïakut ne jingkular hadien ba la dep ruh ban pynïoh ïa ka jaka kaba heh haduh 420 akar.
Namarkata, na ka liang ka KSU hi ka dawa ruh, ba ïa ka Central Agriculture University kaba dang hap ha ka jingpeit jingkhmieh jong ka jylla Manipur, ka dei kaba la pynduhnong shikatdei ia ki samla pule bad ki nongrep, kumta ka Central Agriculture University ka ban don ha Meghalaya ka dei beit ban hap ha ka jingpeit jingkhmieh jong ka sorkar jylla Meghalaya, u la bynrap.
