SHILLONG:
Hadien 8 sngi ba bteng ka jingshah thngan jong u President ka Voice of the People Party (VPP) u Bah Ardent Miller Basaiawmoit, ka Sorkar jylla mynta ka sngi ka la pynjem khnap hakhmat ka jingdawa bad rai ban pynlong da ka jingïalang bad baroh ki seng saiñpyrthei ban ïatai ïathir halor ka bhah thungkam lane ka Reservation Policy ha ka jylla.
Lah ban kdew hangne ba na ka liang ki nongïalam ka VPP, ha ka sngi ba la don ka jingïalang jong ka All Party Meeting, ki la mih jyndat na ka jingïalang hadien ba ka sorkar ka la kyntait ban ïakren halor ka reservation policy halor ka nongrim ba kane ka policy ka dei ka ba noh shiliang, ha kane ka juh ka sngi na ka liang u President ka VPP u Bah Ardent Miller Basaiawmoit u la shim ka rai ba yn sdang da ka jingïakhih shah thngan khlem buhpor ban pynbor na ka sorkar ban ïatai halor ka reservation policy.
Ha ba pyntip halor kane ka Myntri ka tnad ka koit ka khiah ka jylla ka Kong Mazel Ampareen Lyngdoh ka la ïathuh ba ka Sorkar jylla ka la ai ka jingbit ïa ka Committee on Roster ban kynthup lang ïa ka jingïatai halor ka Reservation Policy.
“Nga kum ka Chairman ka Committee on Roster ba la thung da ka sorkar jylla, nga la ïoh ïa ka shithi ba ai jingbit ban kynthup ïa ka jingïatai halor ka Reservation Policy bad la shah ïa ngi ban ïakynduh bad ki nongmihkhmat na ki seng saiñpythei bapher bapher ha ka jylla, ban ïa kren, ban ïa thir bad ban sngewthuh lang halor ka reservation policy”, la ong ka myntri.
“Ngi kyrmen ba kane ka jingailad jong ka sorkar jylla, ïa ka Committee ban shim ïa kane sienjam ba donkam kan long kata ka lad ka lynti bad ka kabu ksiar ïa ki seng saiñpyrthei baroh ki ba don ha ka jylla jong ngi, ban ïoh ban pynsngew halor kane policy”, ka la bynrap.
Ka la pyntip ba ka Committee ka la khot ïa ka jingïalang ka ban long ha ka 31 tarik Jymmang ha Conference Hall jong ka Secretariat, bad bynrap “Kane ka jingïalang ka long ban sngewthuh, kumno ban rah ïa kane ka mat kaba la ktah ïa ka leit ka wan, ka ïaid ka ieng, ka imlang sahlang, ka shnongsuk shongshngaiñ ha kine ki khyndiat sngi ba la dep”.
Ka Kong Ampareen ka la ong shuh shuh, “Nga kitbok kit rwiang ba ki paidbah nongshong shnong ba kin ïoh ïa ka jinghun mynsiem hadien ba ka sorkar ka la shah ban ïathir halor ka reservation policy ka ba la long kum ka khana na ka daw ba wan ka jingbthah ka ïingbishar ban pyntreikam ïa ka reservation policy da ka ba thaw ïa ka roster ki ba u paidbah, ki nongmihkhmat bad baroh ki ba don bynta kin sngewthuh lang halor kane ka mat” . Ka la pynpaw ruh ïa ka jingkyrmen ba baroh ki seng saiñpyrthei ki ba don ha ka jylla kin wan ban ïa shim bynta lang ha kane ka jingïalang ka ban long lashai ka sngi ha conference hall.
