SHILLONG:
Ha ka ba ïadei bad ka jingthmu ban pynkylla thymmai, ïa ka Sixth Schedule da ka sorkar pdeng, ki lai tylli ki Autonomous District Council ha ka jylla, ki la shim ïa ka rai ban ym treh pdiang ïa ka jingpynrung ïa ka kyntien “Unrepresented Tribe” bad ïa ka “Village Council”.
Mynta ka sngi ki CEM jong ki laitylli ki Autonomous District Council ki ba kynthup ïa ka Khasi Hills Autonomous District Council (KHADC), ka Jaiñtia Hills Autonomous District Council (JHADC) bad ka Garo Hills Autonomous District Council (GHADC) ki la pynlong ïa ka jingïalang ban ïakren halor kane ka mat, ha ka jingïalang kaba la long ha Conference Hall ka KHADC ha ka 24 tarik Ïaïong.
Ha ba kren bad ki lad pathai khubor, u Bah Titosstarwell Chyne, u la ïathuh ba halor ka mat ban wanrah ka jingpynkylla thymmai ïa ka Sixth Schedule, kaba long ka mat ka ba la sahteng la slem,
“Ngi kwah ba ka parliament kan pdiang noh ïa kane, hynrei ki don ki mat ki ba dang hap ban ïatai bha kawei na kine ka long halor ka jingpyntreikam ïa ka ‘Village Council’ bad ka ‘Un-represented Tribe”, u la ong.
“Halor kine ki ar tylli ki jingtyrwa, ki ADC ki la ïatai bha mynta ka sngi ha kane ka jingïalang, ha ka ba ngi la kdew ba ka KHADC ka la dep ban pdiang ïa ka wei ka Act ka ba latip kum ka “Village Development Council” bad ngi kwah ban ïohi ba kine ki ar tylli ki District Council ruh kin pdiang lang ïa kane khnang ba ka jingthmu ban pyntreikam ïa ka Village Council kan ym don shuh ha ka jylla” u la bynrap.
“Ngi don ïa la ka jong ka traditional institution bad ka Village Council, kan pynthud ïa ka rukom trei ki tradition institution bad ngi kwah ba kan don beit kumba la buh naduh mynshwa, kumta ngi la ai jingmut baka JHADC bad ka GHADC kan pdiang ïa ka Bill VDC”, la ong u Bah Titos.
U la bynrap, “Halor ka jingtyrwa ban pynrung ïa ka kyntien Unrepresented Tribe, na ka liang ki 3 tylli ki ADC ki kyntait ban pdiang ïa kane, bad kumjuh ngi kwah ba kin pynrung ïa ka Village Development Council ha ka jaka ka Village Council”.
U Bah Titos u la ong ba na ka liang ka sorkar pdeng, ka la dep ban thoh sha ka sorkar jylla ban pynbeit ïa kine ki mat khang ba kan lah noh ban pdiang ïa ka jingpynkylla thymmai ïa ka Sixth Schedule hapoh ka Parliament”.
