NONGPOH:
Ka ophis jong ka District Social Welfare Officer Ri Bhoi District, ha ryngkat ka jingïatreilang bad u District Sports Officer bad ka Meghalaya Home Guard and Civil Defence Ri Bhoi Division, ha ka 26 tarik Jylliew ka la rakhe ïa ka International Day Against Drug Abuse and Illicit Trafficking ha Nongpoh, da kaba pynlong ïa ki prokram bapher bapher kaba kynthup ïa ka jingïaid paidbah bad ka jingpynshai paidbah ban ïarap ïa ki briew ban sngewthuh ïa ka jingktah u drok ha ka imlang sahlang.
Ka District Social Welfare Officer Ri Bhoi ryngkat u District Sports Officer, ha ka step jong ka 26 tarik Jylliew ha ka por kumba 6:30 mynstep ki la pynlong ïa ka marathon kaba 5 km na Saiden shaduh NSCA Indoor Stadium Hall Nongpoh. Katba ha ka por 8 baje mynstep ka District Social Welfare Officer Ri Bhoi ryngkat ka Meghalaya Home Guards and Civil Defence Ri Bhoi Division ki la pynlong ïa ka jingïaid paidbah ha kaba la ïashim bynta da ki khynnah skul bad ki Volunteer ka Home Guards bad Civil Defence.
Haba kren ha ka prokram pynshai paidbah hashwa ka jingïaid paidbah, u Division Commander ka Meghalaya Home Guard and Civil Defence Ri Bhoi Division u la ong, “Lada ngi ieid ïa ka imlang ka sahlang bad ïa ka Ri Bhoi District, ngi dei barabor ban ong em ïa u drok, namar u drok u pynjot ym tang ïa kito kiba la kyrni lane ki bahaïing hasem jong ki hynrei ïa ka imlang sahlang , ka distrik bad ka jylla hi baroh kawei, bad namar ka jingkyrni, u nongpyndonkam drok un tuh un thim ban pynhun ïa ka jingkwah ka jingkyrni jong ki.”
U la ong ruh, “Lada phi don jingeh lane phi ïashem ki jingeh, u drok um dei ka jubab, hynrei lada phi pyndonkam ïa u drok phi nang khring shuh shuh ki jingeh. Kumta ngi dei ban ïarap iwei ïa iwei ban sngewthuh ba u drug u dei uba pynïap bad ba ngi dei ban rat dyngkhong ïa u.”
Ha kawei pat ka liang, ka Kong E. Kharchandi kaba dei ka District Social Welfare Officer Ri Bhoi, ka la ong, “Nalor ka jingsngewthuh ïa ka jingktah ba sniew jong u drok ïa ka imlang ka sahlang, ngi dei ruh ban sngewthuh ba ngim dei ban ñiewbeiñ ïa ki, hynrei ngi dei ban kyrshan ïa ki bad ban btin ïa ki sha ka lynti kaba dei namar ki donkam ïa ka jingïarap jong ngi ban jop bad khiah na ka jingkyrni.”
U Addl. Commissioner ka Ri Bhoi District, u Dr. Abhishek Saini, u la ong, “U drok u lah ban ai jingkmen ïa phi tang shipor hynrei un pynjot ïa phi shi junom.”
Katba na ka liang u MLA ka Nongpoh u Bah Mayral Born Syiem, uba long ruh u kongsan ha kane ka jingrakhe ha District Library, u la ong, “Ka jingïakhun pyrshah ïa ka jingshah thombor ki khunlung khynnah bad ka jingpyndonkam ïa u drok ka dei ka jingïakhun ba ngi dang ïakhun na ka bynta ka imlang ka sahlang. Nga pynpaw ka jingsngewnguh jong nga sha ka Social Welfare Department bad ka tnad pulit bad kiwei kiwei ki tnad kiba ïadonkti lang ha kane ka jingïakhun, namar ka dei namar jong ki ba ngi lah ban ïakhun bad tehlakam ïa kaba kum kane ka jinglong.”
U la ong ruh, “Haba ngi ong em ïa u drok, ngi dei ban ong man ka sngi bad em kamut em. Ha kajuh ka por kiba kyrni drok ki donkam ïa ngi ban kyrshan ïa ki bad ngi dei ban btin lynti ïa ki, bad ka jingïa rap jong ki Rehabilitation Centre kiba bun ha ka jylla bad katto katne ha ka distrik jong ngi, kan lah ban ïarap ban koit na kane ka jingkyrni, hynrei ki dei ban skhem jingmut ban ïakhun pyrshah ïa ka jingkyrni, kumta ngi donkam ban kyrshan ïa ki. Ka jingñiew beiñ ïa ki kan pynjot ïa ki, bad ngi dei ban shim jingkit khlieh ban sumar ïa ka imlang ka shalang.”
Ha kane ka prokram, la don ruh ka jingshim smai bad la ïoh ruh ka jingrwai kyrpang na i B Nongrum bad i Kyntiewlin Mawphniang. La don ruh ka jingsam ïa ki khusnam sha ki nongjop ha ki jingïakop bapher bapher kum ka Marathon ba 5 km, ka Essay Writing Competition, ka Drawing bad Painting Competition bad ka Poster bad Slogan Competition.
