SHILLONG:
Kum ka dak ban rakhe ïa ka jingriewspah jong ki jait Ktien bad Kolshor jong ka ri India, ka School of Humanities jong ka skulbah NEHU, Shillong ka la rakhe ïa ka prokram ba shisngi ka “Bharatiya Bhasha Utsav 2023” hapoh ka jingïalam ka Prof. Streamlet Dkhar, Head jong ka Department Khasi bad ka Chairperson jong ka Bharatiya Bhasha Komiti. Ïa ka jingïalang plie la pynïaid da u Prof. D.K. Nayak, Vice-Chancellor in-charge jong ka skulbah NEHU, Shillong.
Ha kane kane ka jingïalang ba la pynlong, u Bah A.L. Hek, u Myntri ba dei khmih ïa ka Animal Husbandry bad Vertinary u la long kum u kongsan.
Ha kane ka jingïalang la ïoh ruh ïa ka jingkren pdiang sngewbha na u Dean, Prof. Vanlalnghak, bad ïa ki kyntien ai khublei na ka Prof Streamlet Dkhar.
Haba ai jingkren ha kane ka jingïalang u Bah Hek u la ong ba ka jingburom ïa lade ka pynlong ba ngin burom ruh ïa kiwei. U la ong ruh ba ka jylla Meghalaya ka long kaba riewspah ha ka liang jong ka ktien bad lyngba ki jait ktien tnat bad riti dustur kiba pynneh ïa ka jinglong tynrai.
Shuh shuh Symbud kongsan, u Rajesh Kumar uba long u stad pyrkhat halor ka ktien na NIT, Madras u la ai jingkren da kaba u la ong, ba ka ktien ka long ka nongrah ïa ka jingshai. Ki jait ktien bapher ka ri India ki don shibun hynrei ka Ri ka pyntylli kawei ïa ki jaitbynriew.
Hadien ka jingïalang plie la don ruh ka jingïatyrko bad ïamir jingmut halor ka phang “Ka Teknoloji bad lyngba ki jait Ktien jong ka ri India” da ki riewshemphang, u Dr. Abir Suchiang, na EFLU, u P. Sudeep Manngang na NIT, Shillong, u Dr. A. K. Majhi na IT, NEHU, u Buddha Chandrashekhar, AICTE, New Delhi bad u Prof. S.K. Singh kum u nongpynïaid. La pynbud ruh da ka Jingpule Poitri ha ki jait Ktien bapher bapher, ki jingrwai bad ki jingshad Tynrai. La die ruh ïa ki jingbam Tynrai bad ka jingpyni ïa ki poster kiba kren halor ka Ktien ha kane ka sngi.
