NONGSTOIÑ:
Kum shibynta jong ka jingrakhe ïa ka International Day Against Drug Abuse & Illicit Trafficking 2023, ka ophis jong ka District Social Welfare Officer, West Khasi Hills District, Nongstoiñ ha ka 26 tarik Jylliew ka la pynlong ïa ka prokram pynsngewthuh paidbah halor ka phang “People first: stop stigma and discrimination, strengthen prevention” lane ‘’ Ka mynsiem briew kaba tam: sangeh ka peitkynriang bad niewbein, pynkhlain ïa ki lad jingïada’’ ïa kaba la pynlong ha ka skul St John Bosco Higher Secondary School, Rambrai.
Ha kane ka sngi, la sakhi ïa ka jingïashimbynta shitrhem jong ki khynnah na ki skul kiba pher bapher jong ka thain Rambrai ha ka jingïaid rally pyrshah ïa ki droks, kaba la sdang na ka skul United National Secondary School, Mawrang ter ter shaduh Iew Rambrai bad la pynkut ïa kane ka jingrakhe da ka prokram pynsngewthuh paidbah ha St John Bosco Higher Secondary School, Rambrai halor ka jingma kiba mih na ka jingdih drok.
U BDO jong ka Rambrai Block, U Bah S. Marwein uba la leit kum u kongsan ha kane ka prokram, ha ka jingkren ka jong u sha ki khynnah skul, ki nongtrei ASHA, ki nongtrei Anganwadi bad paidbah jong ka thain Rambrai, u la kyntu jur ïa baroh, khamtam eh ïa ki khynnah skul ba horkit hordang kim dei ban ngop ha ka jingdih drok namar u drok u ai jingkmen tang shipor namar lait nangta sa tang ki jingeh kin wan ban tap ha ka jingim ka jong ki.
U la ong ba ki khynnah skul kidei ban trei shitom bad minot thop ha ka jingpule ka jong ki khnang ba ki lah ban tei pynbha ïa ka imlang ka sahlang. U la ban ruh ba ka jingpyndonkam ïa u drok ka ktah ïa ka met ka phad, ka jingmut jingpyrkhat, ïa ka imlang ka sahlang bad ka ktah ruh ïa ka ïoh ka kot bad kumta donkam ban rat dyngkhong ïa une u jingsniew napoh ka imlang ka sahlang.
Ha kane ka sngi, u kongsan u la ïoh ruh ban pyllait paidbah ïa kawei ka sur jingrwai kaba la rwai da i Kong Joymery Khardewsaw ïa kaba la ïarap pynmih da ka ophis jong ka District Social Welfare Officer Nongstoin. Kane ka sur jingrwai ka ïawer bad kyntu ïa baroh ba kin kïar na ka jingdih bad pyndonkam ïa u drok.
Ïa kane ka prokram la pynïaid da I Kong, S. Iawphniaw ha ka jingdon ryngkat jong I Kong V.C War, District Social Welfare Officer, West Khasi Hills District iba la ïalam ban pule ïa ki jingkular halor katei ka phang pdeng ha baroh kiba wan ïashim bynta ha katei ka prokram.
Kiwei kiwei pat ki riewshemphang kiba la ïadon bynta lang ha katei ka prokram pynsngewthuh paidbah halor u drok ki kynthup ïa i Kong, I. Shadap, Clinical Psychologist, Nongstoin, U G.K Sangma, Inspector of Police, bad i Kong G. Thongni iba dei i Counsellor jong ka Kripa Foundation bad baroh na ki, ha ka jingkren ka jongki ki la kyntu bad wer lang ïa baroh ban kiar na ka jingdih droks bad ki la kyntu ruh ba ka donkam ïa ka jingïatreilang jong baroh khnang ba yn lah ban rat dyngkhong ïa u drok napoh ka dong ka thain hi baroh kawei.
Shuh shuh, ki la kyntu ïa ki paidbah baroh ba kim dei ban niewbein ne ban peitkynriang ïa kino kino ki briew kiba la kyrni ha ka jingdih drok hynrei kidei ban ïarap ïa kum kita ki briew khnang ban ïoh pynbha pat ïa ka jingim ka jong ki.
