SHILLONG:
Ha kine ki khyndiat sngi, ngi ïohi ïa ka jingïatai kaba jur ha ki lad pathai khubor bad ruh ha ki rynsan Social Media haba ïadei bad ka wei ka mat kata ka Roster System.
Na ka liang U Symbud Myntri Rangbah ka Jylla u Bah Prestone Tynsong, haba jubab ïa ka jingkylli, ha kano ka bynta ka Sorkar ka ïeng haba ïadei bad ka Roster System, u la ong, “Ka jingpyntrei kam ïa ka roster system ka jia ha ki snem 2022 ha kaba ka ïingbishar badon burom kala ai ïa ka jingbishar jong ka bad ka sorkar kala file ïa ki affidavit palat ïa ka lai sien bad ruh ka jingkyrpad ïaka ïingbishar badon burom ka Meghalaya High Court ba kin shah ïa ngi ban pyndonkam ïaka roster system ‘shakhmat’ lane ‘prospectively’ ym ‘shadien’ lane ‘retrospective’.”
U la bynrap ruh da kaba ong, “Ba ka ïingbishar ba don burom ha kito ki por ki la pynbor ïa ngi bad ki la ong ba ngi dei ban pyntreikam shadien (retrospectively) kaba mut naduh kaba sdang jong ka Reservetion Policy.”
U Bah Prestone u la ong ba ngi dang ap ïa u Myntri Rangbah, mar sien poi u Myntri Rangbah ha Nongbah Shillong, kin sa don ka jingïakynduh jong ki Myntri sorkar, kan don ruh ka jingïa kynduh jong ka MDA bad ruh ka jingïakynduh jong baroh ki seng saiñpyrthei ka jylla ban ïakren halor kane.
“Ngi la kyrpad ba ngi thrang ban pyntreikam ïa ka shakhmat (Prospectively), hynrei ka High Court kala kyntu bad bthah ba dei ban pyntrei kam naduh ba sdang jong ka reservation policy,” ong u Symbud Myntri Rangbah.
Haba ïadei bad ka jingthep kam pulit bad ka interview kaba dang ïaid, u Bah Pynsong u la ïathuh ba ki don kumba 1000 tam ngut ki samla kiba la khot na ka bynta ka personal Interview kiba kane ka dang ïaid mynta.
U la bynrap ruh da kaba ong, “Mar ïadep kane ka personal interview, ngin sa khot biang ïa ka jingthep kam pulit na ka Bynta 1500 tylli ki kam kiba lait ha ka tnat.”
“Kane ka kam kan sa sdang shen, bad ngin peit ba ki kam kiba lait yn pyndap ha une u snem ba mynta,” ong u Symbud Myntri Rangbah.
