SHILLONG:
U Chief Secretary ka jylla Meghalaya, u Bah DP Wahlang, ha ka 14 tarik Ïaïong u la ïathuh ba ka Wahumkhrah bad ka Wah Umshyrpi ha Shillong ki dei ki wah kiba hap ha ka thup jong ki 45 tylli ki wah kiba jakhlia tam ha ka Ri, kumba la pynrung da ka National Green Tribunal (NGT).
U Bah Wahlang u la ong ïa kane ha ka jingïalang ba la pynlong ha Yojana Bhawan Shillong halor ka jingpynthymmai bad ka jingpynbha ïa ki wah kiba kongsan ka Shillong kiba kynthup ïa ka Wahumkhrah, ka Wah Umshyrpi bad ka Wah Umkhen, ha kaba la ïadon ryngkat u Myntri Rangbah ka jylla u Conrad Sangma bad ki dkhot jong ki dorbar shnong, bad ki nongmihkhmat na ki seng ha ka imlang ka sahlang.
Ban pynbeit ïa kane, u Bah Wahlang u la ong ba kane ka kam kan long kaba shim por bad yn ym lah ban buh por ïa ka jingpyndep ïa ka jingpynkhuid ïa kine ki artylli ki wah hynrei u la ïathuh ba la shim ïa ki sien jam kiba donkam da kaba ïatrei lang bad kiwei kiba don bynta lang khnang ba kane ka kam kan long kaba jop.
