JOWAI:
U myntri rangbah ka sorkar jylla, u Conrad Sangma, ryngkat bad ki kynhun myntri jong ka sorkar MDA (Meghalaya Democratic Alliance), ki la hiar sha ka shnong Mukroh, West Jaiñtia Hills District, ban ïakynduh ïa ki bahaïing hasem jong ki san ngut ki Khasi, kiba la khlad noh hynnin ka sngi ha ka jingshah siat ha ki pulit Assam. U myntri rangbah u la aiti ruh ïa ka cheque pisa kaba san lak tyngka sha kawei kawei ka longïing kaba mad ïa kane ka jingjia ba sngewsih. Ha kane ka sngi la pynlong ïa ka jingïalang kaba lyngkot ha ïing jong u Waheh Shnong, u Ma H. Sumer. La pynïaid ïa ka jingïalang da u Ma Comingson Dkhar uba dei u Chairman ka Labang Nongphyllut Pangam Raliang Area Committee. Ha shuwa ban ïoh ki jingkren na u myntri rangbah, la ïoh ruh ki jingkren lyngkot na ki katto katne ki rangbah kiba kynthup ïa u Ma M. M Thaïang, u Ma Philip Talang, u Ma Hamboi Sumer bad kiwei de.
Ha ka jingkren lyngkot, u myntri rangbah u la ong, “Nga sngewkthang ban ïohi ïa kane ka jingpait dohnud jong kine ki longïing. Ha kum kane ka por, ngi na ka liang ka sorkar, ngi don ryngkat bad phi bad ngin leh lut katba ngi lah ban pynthikna ba ka jingbishar ba hok phin ïoh bad kito kiba donkti ki dei ban shah pynshitom katkum ka aiñ,” la ong u Conrad.
“Nga lah ïakren bad ki tnad treikam jong ka sorkar pdeng, bad nga la kyntu ba ki dei ban ïatreilang ban wanrah ïa ka jingbishar kaba hok. Ngi lah pan na ka sorkar pdeng ba ka dei ban hukum ba ka tnad CBI (Central Bureau of Investigation) ne ka tnad NIA (National Investigation Agency), ka dei ban sdang ïa ka jingtohkit halor kane ka jingjia. Na ka liang ka sorkar Assam, ka la kular ba kan ïatreilang bad ka la mynjur ba ka kynhun tohkit kyrpang, kum ka CBI, kan tohkit halor kane ka jingjia,” la ong u Conrad.
“Ngi lah wan hangne ban pyntip ba ngi don bad phi bad ngin leh ïa kaba donkam. Nga ai ka jingsngewlem sha baroh kito ki paidbah jong ka shnong Mukroh, kiba la mad ïa kane ka jingjia kaba kthang. Ngin pynthikna ba kum kine ki jingjia kim dei ban jia shuh bad phin ïoh ïa ka jingbishar ba hok,” la bynrap u Conrad.
“Ka sorkar pdeng kan ïadonryngkat bad ngi. Ngan leit ban ïakynduh ïa ki ophisar ki bapher bapher kiba trei ha ki tnad jong ki kam pohïing, jong ka sorkar pdeng. Na ka liang jong ngi, ngin ym shongthait haduh ba kane ka jingïapynbeit khappud kan long kaba jop. Kane ka dei ka kam kaba kyllaiñ bad na ka liang ka sorkar jylla, kan ïaid shakhmat ban pynthikna ba kane ka jaka hangne kan shongsuk shongsaiñ,” la ong u Conrad.
Ha kane ka jingleit sha Mukroh la synrang lang ia u MR da ki saw ngut ki myntri kiba kynthup ia u Symbud Myntri Rangbah, u Prestone Tynsong, u Renikton L Tongkhar, u Sniawbhalang Dhar bad u Kyrmen Shylla.
