PYNURSLA:
Kumba 50 ngut ki briew ki la sah kut ha surok ha ka miet jong ka 14 tarik Ïaïong hadien ba ka jingtwa u lum ka la ktah ïa ka bynta jong ka surok Shillong-Dawki hajan Rngaiñ, ha kaba kawei ka kali ka la shah lynthem ha ki maw bad shah khynñiat sha riat.
Hapdeng ki nongleit nongwan kiba sahkut, hynnin ka miet bun ki la hap ban ïaid da ka kjat ban leit phai sha ki shnong jong ki katba kiwei ki sah shadien da kaba ap haduh ban da pynkhuid ïa kane ka surok, kaba ki bor peit ki la ong ba kan shim por.
Katkum ka jingïathuh uwei na ki nongñiah kali tourist, bun ki kali ki la leit phai noh hynnin ka miet katba katto katne ki la sah. Ki katto katne kiba la sah miet ha surok hynnin ka miet, ki la leit phai noh sha la ki shnong ha ka step jong ka 15 tarik Ïaïong da kaba ïaid kjat.
“Hynrei nga bad ki katto katne, ngi la hap ban sah namar ba ngi kit mar ha ki kali jong ngi kiba ngi hap ban pynpoi ha ki shnong. Ngim lah ban leit phai biang sha Sohra bad ngim lah ruh ban ieh ïa ki kali jong ngi hangne,” u la ong. “Ngin hap ban ap ïa kaei kaban jia,” u la bynrap.
U la ong ruh ba kane ka jaka ka dei kaba ju jia ka jingtwa ki lum bad u la ïathuh ba ha ki por lyuir ki nongñiah kali ki la hap ban husiar haba ki ïaid na kane ka surok. “Ngi hap ban peit shajrong man ka por. Kane ka surok ka long kaba ma,” u la bynrap.
Kumban shu pynkynmaw, kawei ka kali ka la shah lynthem ha ki maw ha ka miet jong ka 14 tarik Ïaïong na ka jingtwa u lum. Watla la lap ïa ka kali, ym pat shym la lah ban sei ïa ki ar ngut ki nongshong, uwei ïa uba la tip ba u dei u Rangbah Shnong ka shnong Wahlyngkhat, bad la suba ba kine ki ar ngut ki la khlad noh. Kawei pat ka kali tourist ka la lait salit na ka jingshah lynthem ha ki maw bad ki nongshong ki la mynsaw malu mala bad la rah noh ïa ki sha ka jaka sumar kaba hajan.
Haduh kane ka kynti, ka kynhun kaba wad (search and rescue) ka dang bteng ban weng ïa ki maw ba heh khnang ban sei noh ïa ka met jong ki ar ngut ki rangbah.
