SHILLONG:
U Myntri Rangbah ka jylla, u Conrad K Sangma u la sah ha ka umdum hadien ba u la tip lyngba ki lad pathai khubor ha ka 27 tarik Jylliew ba ka jingkhang ïa ka jingwanrah ïa ki dohkha na shabar lah dep ban weng naduh ka 24 tarik Jylliew.
Ha ka 26 tarik Jylliew, u myntri rangba haba ïakren bad ki lad pathai khubor ha ka por mynsngi u la ong ba ka sorkar kan bishar bniah shwa halor ka jinglong jingman shwa ban rai ban weng noh ïa ka jingkhang wanrah dohkha na shabar ha ka jylla.
“Ngin sa ïapeit, ngin sa peit shwa ïa ka jinglong jingman”, la ong u Conrad haba kren bad ki nongthoh khubor haba kylli lano yn weng noh ïa ka jingkhang wanrah dohkha.
U la ong ba ka tnad ka koit ka khiah kan sa peit halor kane ka kam, bad pynthikna ruh ba ka sorkar kan pyrshang ban weng noh ïa kane ka jingeh kloi katba lah.
Hynrei tang hadien khyndiat kynta na ka jingkren jong u myntri rangbah, ha ka janmiet la mih ka jingpynbna na ka Commissioner ka Food Safety, Meghalaya, Shillong ba la weng ïa ka jingkhang ban wanrah ïa ki dohkha ba na shabar kaba la treikam naduh ka 24 tarik Jylliew bad kane ka pynpaw ba u Myntri Rangbah um don jingtip ei ei halor kane ka rai jong ka tnad kaba peit ïa kane ka bynta.
