SHILLONG:
Ka Hynñiewtrep Youth Council (HYC) Mawlai Circle ha ka 15 tarik Lber ka la ïakynduh ïa ki Executive Engineer (EE) jong ka tnad Public Work Department (PWD) Road Shillong Central Division U Bah C. Kharmudai halor ka jingsiang rong ïa ka surok hapoh ka shnong Mawlai kaba la sahteng naduh u bnai Nohprah, 2022.
Lah ban kdew ba ïa kane ka surok hapoh ka shnong Mawlai ka la ïaid shait shait ha ka jingsiang rong hynrei ka la sahkut noh shiteng naduh lad skul haduh Mawlai Petrol Nonglum naduh u bnai Nohprah 2022 kumba 200 meter ei ei.
Haba kren sha ki lad pathai khubor, u President ka HYC Mawlai Circle u Bah Donboklang Kharlyngdoh u la ïathuh ba ha ka jingïakren bad u EE ka tnad PWD u Bah Kharmudai u la ong ba kane ka kam ka sahteng dei namar ba ka don ka jingïatynkhuh kam bad ka tnad Public Health Engineer (PHE).
“Ngi sngewthuh ba haba ïatyngkhuh bad kiwei ki tnad ka la pynlong ïa u kontraktor hap ban iehnoh shiteng por ïa kane ka kam. Ngi la pyrshang ban kynduh ha kine ki por ba la dep hynrei namar ka jingdon jong ka elekshon ngim shym la ïoh kynduh, hynrei mynta ka sngi ngi la ïoh ban ïakynduh ïa u EE ka tnad PWD ban buddien ïa kane ka kam bad la kumno kumno dei ban pyndep noh kloi ïa kane ka project kaba la sdang naduh ka Iingmane Balang Presbyterian Mawroh ter ter sha Mawlai Petrol Pump”.
U Bah Donboklang u la ïathuh ba na ka liang u EE ka tnad PWD u la ong ba la kumno kumno ha kane ka taiew ban wan kin pyndep noh kloi ïa kane ka surok kaba dang sahteng kumba 200 meter ei ei.
Na ka liang ka seng HYC Mawlai Circle ka la kyntu ïa ka tnad Public Health Engineer (PHE) ba kan peit bha khamtam ïa ki Pipe, khnang ba kan nym ktah ïa ka surok. “Ngim lah ban len ba ka jingbha bad jingsniew jong ka surok ka shong sa ha ki Pipeline kiba long kumno. Ki don ki bynta hajan jong ka Mathius Institute ka don ka jinglait ki pipe bad kane ka tnad PHE kam shym la peit bha bad lada ka long kumne kine ki surok hapoh ka shnong Mawlai bad kiwei kin neh tang shipor, namar ba ïohlad ka um ban ksam lane ban ïaid ha surok”.
Ha kaba ïadei bad ka surok Mawroh kaba wan na Mawkynroh u Bah Donboklang u la ïathuh ba hangto hajan PHC ka don jingtrei kaba la pynlong ïa ki paidbah ki nongleit nongwan kiba leit shim dawai ki hap ban mad ïa ka pum pum. U la ong ba kane ruh ka don ka jingïatynkhuh bad kawei pat ka tnad katkum ka jingïathuh u EE ka PWD bad la ïathuh ruh ba kane ka jingtrei ha kane ka jaka la trei da uwei pat u kontraktor. Na ka liang u EE u la ïathuh ba ïa kane ruh la kumno kumno yn pyndep noh.
U Bah Donboklang u la ïathuh ba na ka liang u EE u la kren shai baa naduh na lad Sanker yn pyndep haduh ha Mawlai Iingmane Presbyterian, Balang Mawroh.
Kumta na ka liang ka seng ka khmih lynti ba ki kam ki jam kin ïaid beit ban pyndep ïa kane ka surok hapoh ka shnong Mawlai hapoh kine ki taiew ban wan.
