JOWAI:
Ka Myntdu Pynthorneiñ Farmers Welfare and Producers Organization (MPFW&PO), ka la ïoh ban sam ïa u symbai Phan (Sohlah) mynta ka sngi, u ba la ai da u Dr. D Paswet, u ba peit ïa ïing treikam KVK West Jaiñtia Hills District, Wahïajer; sha ki 30 ngut ki nongrep jong ka shnong Khliehtyrchi bad Mihmyntdu, ha Myntdu Pynthorneiñ, West Jaiñtia Hills District.
Ha shuwa ban sam ïa une u symbai Phan, la ïoh ïa ka jingkren na u ma Pynchngain Rymbai uba long u President ka seng, uba la ïathuh ba na ka liang ka ïing treikam jong ka KVK, ka la ai ka jinghikai halor ka rukom rep phan bad nangta ki la ïoh ïa une u symbai Phan uba kham bha. Kumta u la kyntu ïa baroh ki nongrep ba marsien poi ha ïing, hadien ka jingrep ïa u Kba, ki dei ban pynkhreh noh sa ban rep ïa une u Phan, khnang ba kat ban poi biang ka por rep Kba, kan pynlong sboh ïa ki hali na kane ka jingrep ïa u phan.
Na ka liang u ma Khroo. L. Pariat uba long u nonglam lynti bad nongaibuit jong ka seng, u la ai ka jingkhublei ïa baroh ki nongrep kiba la pyni ïa ka jingïabeit, jingïaryntih ka jong ki bad ka jingïatylli jong ki khamtam ba ki la shim ban pynkylla ïa ka rukom pyrkhat jong ki ba hadien ba la dep ban ot ïa u Kba, dei ban rep pat sa u Phan, ha ka por tlang ha ki hali ki jong ki. U la pynkynmaw ruh ïa ki nongrep ba ka sorkar jylla ha kine ki bnai kiba la dep ka la ai da ka pisa kaba san hajar tyngka sha ki nongrep, bad u la ong ba lada kim nang pyndonkam ïa kane ka pisa, kan shu long lehnoh ei ïa ki.
Ki nongrep kiba shisha jong ka Myntdu Pynthorneiñ ki la ïoh ïa u symbai kba, symbai jhur lyngba ka jinglam lynti ka seng ryngkat ka jingïatreilang ka ophis jong ka tnad Agriculture bad KVK West Jaiñtia Hills. Ha kane ka sngi la ïoh ruh ïa ka jingkren na u ma Pyntngen Kyndait General Secretary MPFW&PO, u Dr D. Paswet na ka KVK West Jaiñtia Hills District, ryngkat ka jingïadonlang ki nongrep.
