SHILLONG:
U Myntri Rangbah ka Meghalaya, u Conrad K Sangma ha ka 1 tarik Jylliew, u la pyllait paidbah ki kali na ka bynta ka rep ka riang ha Meghalaya, kum ka jingpyntrei kam ïa ka skim Prime Agriculture Response Vehicles ha MAMETI, Upper Shillong, ha kaba la don lang ka Myntri ka rep ka riang ka Dr. M. Ampareen Lyngdoh, ka Secretary ka rep ka riang ka Kong Isawanda Laloo bad ki heh Sorkar jong ka tnad ka rep ka riang.
Haba Kren ha katei ka sngi kum u Kongsan, u Conrad K Sangma u la ai burom ïa ka tnad ka rep ka riang kaba la sdang ban pyndonkam ïa ki kor ki bor jong ka jingstad ka juk mynta, ha kaba la lah ban pynkiew ïa ka rep ka riang bad ka jingpynkiew ruh ïa ka kamai kajih jong ki nongrep ha kane ka jylla. “Haduh 80 na ki 100 jong ki briew jong ngi, ki dei kiba im na ka rep ka riang bad dei na kane ka daw ba ka long kaba kongsan ba ki nongrep jong ngi, ki dei ban ioh ia ki jingkyrshan da kaba pyntreikam ïa ki skim bapher bapher jong ka Sorkar”, la ong u Myntri Rangbah Conrad K. Sangma.
Haba kren shaphang ka rep ka riang, kum kawei na ki lad ïoh kam ïoh jam bad ban pynbiang bam ïa ki nongshong shong, u Myntri Rangbah Conrad K.Sangma, u la ong, “Haduh 50,000 ngut ki samla ki hap sha ka thup jong kiba dei ban ïohkam bad ka Sorkar bad ki kynhun trei kam shimet kiba la ban ai kam ïa kitei ki briew. U la ïathuh ba ka Sorkar ka lah ban ai kam tang 3,000 ngut bad ïa kiwei pat ki samla ki hap ban trei bad ki kynhun trei kam shimat ba la tip kum ki Private Sector. Kine ki kynhun shimet kiba lah ban aikam aijam ïa ki samla jong ngi ki long ha la liang ka rep ka riang, ka jingpynmih bam, ki kam jngohkai pyrthei bad kiwei ki kam kiba ai jingshakri ïa ki paidbah. U la iathuh ba ka long kaei kaei kaba sngewtynnad ha ki Private Sector ki la nang kiew na kawei ka por sha kawei pat. U Myntri Rangbah Conrad K. Sangma u la ïathuh ba kan sa don ka jingsam ïa ki 200 Prime Agriculture Response Vehicles hadien katto katne por. Ïa ki 200 tylli Prime Agri Response Vehicles yn sa sam sah ki Cooperative Societies, Self Help Groups, Farmers Producer Organizations bad sha kiwei ki nongrem ha ka jingsiew kaba tang shiteng dor, bad ïa kata ka shiteng dor pat yn sa buria ne siew pat da ka Sorkar.
U la ïathuh ba ka jingtmu jong kane ka jingtrei kam ka long na ka bynta jong ki nongrep kiba rep ha ki jaka nongkyndong kiba ïakynduh jingeh ha liang ka leit ka wan na ka daw jong ka jingbym biang ki lynti ki syngkien bad ka jingbym don jong ki surok ha kitei ki shong ki thaw. Kane ka jingai ïa kine ki kali sha kine ki nongrep ka long ban plie lad plie lynti ïa ki ba kin lah ban pynkiew ïa ka kamai kajih jong ki. Ha katei ka sngi la duh ruh ka jingsam ïa kine ki 20 tylli ki kali sha ka Integrated Village Cooperative Societies jng ka Khasi bad Jaintia Hills. Ha kane ka sngi, la don ruh ka jingpyntrei kam ïa Agriculture-Farming apps kum ka CROPSAP, Crop Pest Surveillance bad Advisory Project, kynthup ruh ïa ka ki WEB bad Mobile application na ka bynta ban ïada ïa ki jingthung Crop Pest Surveillance and Advisory Project Management System, Horticulture Hub MIS application na ka bynta ki kam kiba ïadei man la ka sngi, kum ka die ka thied, ki jingai jinghikai, ka jingthiar ïa ki mar rep, Meghalaya State Agriculture Marketing Board, Meghalaya Farmer App bad ïa MAMETI website.
