NONGPOH:
Haba ïadei bad ka jingjia ba twa ki bynta ka jingkieng Dwarksuid, kaba la twa hynnin ka sngi u Blei ha surok u Bah Goerge B. Lyngdoh, MLA Umroi, u la ong ba ka daw jong katei ka jingjia bad kaba la wanrah ïa ka jingthut ha ka leit ka wan ki paidbah, ka dei namar ka jingbym shimkhia ka sorkar, kata naduh ki por ba ka dang don jingthut hapoh katei ka jingkieng.
U MLA Umroi, hadien ka jingleit jurip bad ki briew na ka NHAI bad PWD, ha kaba la lap ba katei ka jingkieng kam long shuh kaba shngaiñ, ha ka leit ka wan ki kali bad katno tam lei na bynta kito ki kali kiba la kit palat pud, ha kaba lada ka jingïaid ki kali kitkhia kan dang ïai bteng, kaba mut ba kan sa poi ka por ba katei ka jingkieng ba kan kdiah bad ym long shuh ban ïaid kali.
Haba ïadei bad ka jinglong jingman jong katei ka jingkieng, u Bah George B. Lyngdoh, u la ong ba katei ka mat kam dei shuh kaba dang mynne mynta, hynrei ka dei kaba la 4 snem mynshwa bad kaba dei ruh kaba la ju mih ka jingdawa kaba man ka por sha ka sorkar jylla, ba ka dei ban shna noh da kawei ka jingkieng, khnang ba kan long shngaiñ ha ka leit ka wan ki kali.
“Ngam sngewpher shuh halor kane ka jingkieng, namar la bunsien nga la kren wat ha Ïing Dorbar Thawaiñ ka sorkar jylla, na ka bynta ban pynsngew halor ka jingdonkam ba kyrkieh ban shna bha noh ïa katei ka jingkieng, pynban ka sorkar jylla kam shym la shimkhia, hynrei ka sa sdang ban khih khohreh, tad haba ka um ka la poi ha ryndang” ong u Bah George B. Lyngdoh.
Nalor ka jingkieng Dwarksuid, sa ka jingkieng heh ka Damsite ruh ka la don hapdeng ka jingma, ha kaba wat ka Ïingbishar badon burom ka Meghalaya High Court, ka la pynmih ïa ka kyndon ba kino kino ki kali kiba la kit palat ïa ka 10 ton, kim lah shuh ban ïaid lyngba katei ka jingkieng, la bynrap u Bah George B. Lyngdoh.
Shuh shuh, u la ong ruh, tang namar ka jingbym shimkhia ka sorkar ban thawlad halor ki jingkieng kiba donkam ha ka jylla, ka la wanrah ruh ïa ka jingkiew dor ha ki marbam mardih, namar ki kali kit marbam ki la hap ban ïaid ïa ka lynti kaba kham jngai bad kaba donkam ban siew khambun ïa ka bai kali.
