SHILLONG:
Ka Meghalaya High Court ha ka hukum ba shipor ha ka 8 tarik Nohprah, ka la bthah dei ban sangeh shwa ïa ka jingpynbeit pud hapdeng ka Assam bad ka Meghalaya haduh ban shim biang ïa ka jingbishar.
Ha ka hukum ka High Court ka la bthah ba ym dei ban leit thung mawpud, ne ruid pud ha madan ha kine ki sngi tad haduh ban pyllong biang ïa ka sngi bishar.
Ka hukum jong ka kashari, ka dei hadien ba ki saw ngut ki khlieh nongsynshar, ki la ujor sha ka kashari halor kane ka jingpynbeit pud hapdeng ka Assam bad ka Meghalaya. Ki khlieh nongsynshar kiba ujor ki long u Bah R Hamberley Wahlang, Syiem ka Hima Jirang, u Bah Ainam Manik, Acting Syiem ka Hima Mylliem, u Bah Pholasly Nianglang, Sirdar ka Nonglang Sirdarship bad u Bah Erald Jyrwa, Acting Syiem ka Hima Nongspung.
Ka Kashari ka la pynkut noh shwa shipor ïa ka soskular (MOU) pynbeit pud hapdeng ka Assam bad ka Meghalaya kaba la ïasoi hapdeng u Conrad K Sangma, u Myntri Rangbah ka jylla Meghalaya, u Himanta Biswa Sarma, u Myntri Rangbah ka Assam bad u Amit Shah uba dei u myntri kam pohïing ka sorkar India, ha ka 29 tarik Lber 2022.
U nongïasaid aiñ jong ki nongujor, u P. Sharma u la ong ba ka Memorandum of Understanding (MoU) kaba ïasoi hapdeng ka Meghalaya bad ka Assam katkum ka aiñ kam ïeng satia bad kan ktah ïa ki jaka ki puta. Katba u nongïasaid ka sorkar u Advocate General u A. Kumar, ba ïarap u Bah A.H. Kharwanlang, u la ong ba kam don kano kano ka hukum kaba donkam ïa kane haduh kane ka bynta namar ba ïa ka jaka kiba la ujor ruh khlem kdew eiei bad kan ym don kano kano ka jingduh halor ka jingïasoi ïa ka MoU lada ïaid shakhmat.
Haba bishar ïa ka jinglong ka kam bad ki jingkyrpad jong u Advocate General, ka paw ba ka donkam ban thep da ka affidavit ban pynlah ïa ka Kashari ban bishar ïa kane ka kam kumba la kyrpad kiba ujor.
Ka Kashari ka la ailad ïa u Advocate General ban ujor da ka affidavit bad ban wanrah ha ka sien shong dorbar kaban long ha 06.02.2023.
Halor kane, u Nongbishar Justice HS Thangkhiew u la ong, “La sngewthuh ba ha kine ki sngi, ym dei ban leit thung maw pud, ne ruid pud katkum ka MoU kaba ïasoi ka 29.03.2022 haduh ban pyllong biang ïa ka jingbishar”.
Lah ban kdew ba ki sorkar kynthup ka sorkar Meghalaya bad ka sorkar Assam kila dep ïaid shakhmat ïa ka jingpynbeit pud kaba nyngkong ha ki 6 tylli ki jaka katba sa hynriew tylli ki jaka, dang pynkhreh ban ïaid shakhmat. Na ka liang ka Meghalaya ka la dep thaw ïa ka Regional Committee jong ka kylla baar ka jingpynbeit pud katba ka Assam kam pat pynbna eiei.
