SHILLONG:
Ka sorkar Meghalaya ka la pynmih ïa ka jingpynbna ban sdang biang ïa ka jingthungkam bad ka jingpynmih ïa ka jingpynbna halor ki kam ba lait ha ka jylla, naduh ka 14 tarik jylliew.
Ha ka 19 tarik Jymmang 2023, ka sorkar jylla ka la rai ban pynsangeh shwa shipor ïa ka baroh ki jingthungkam ha ka jylla, katba ka Committee ka ba la khlieh da ka Myntri ka Tnad ka koit ka khia ka sorkar jylla ka Kong Ampareen Lyngdoh kam pat aiti ïa ka kaiphot bishar halor ka jingpyntreikam ïa ka roster system ha ka jylla.
Ka Sorkar Jylla ha ka 14 tarik Jylliew, ha ka notification ba la pynmih ka kdew ba ka sorkar ka la shah ban sdang biang ïa ka jingthungkam bad ban pynmih ïa ki jingpynbna na ka bynta ki kam ki ba lait naduh ka 14 tarik Jylliew 2023.
Katkum ka notification, ka sorkar jylla ka la kdew ruh ba baroh ki jingthungkam bad ki jingpynmih ïa ki jingpynbna na ka bynta ki post bapher bapher ki ba la shah pynsangeh ha ki por ba la dep, la lah ban sdang biang bad dei ban bud pyrkhing ïa ka jingpyntreikam kat kum ka office memorandum (OM) ka ba la dep pynkylla thymmai halor ka reservation roster naduh ka 14 tarik Jylliew.
Halor ka jingpynkylla thymmai ïa ka Reservation roster: Ka Office Memorandum kaba thymmai la pynkylla na ka OM jong ka 10 tarik u Jymmang 2022. Katkum ka notification, la kdew ba ka bhah kam ha ka jylla ka dei ban long ïa ka post na ka bynta ki Schedule Tribe/Sechedule Caste ka dei ban long kat kum ka resolution jong u 12 tarik Kyllalyngkot 1972.
Ka Reservation roster, ym dei ban pyntreikam ha ki kam ki ba lait, na ka ba shah pynkynriah kam, ki ba shah thung lane ki ba shah pynkiew kyrdan, ïa ki ba shu thungkam shipor tang na ka bynta 45 sngi, ki ba trei sngi ki ba trei bylla bnai ki ba trei contractual ym dei ban kynthup hapoh ka roster system.
Ka Reservation Roster ba thymmai ka kdew: Ki kyrteng jong baroh ki kyrtong ki ba la ïoh ïa ka post, katkum ka tarik ka ba la don ha ka notification jong ka OM, ka ba la sdang ban jied ha ki por mynshwa, kaba don tang ki data, yn shim bad yn pyntreikam katkum ka roster point ka ba wan mynta ka kynti.
Kiba donkam ban ïoh jingbit na ka tnad Personnel & A.R (B) department : Baroh ki tnad, District heads bad PSUs ka ba don ïa ka post ka ba lait, kin donkam ïa ka jingbit na ka tnad personnel bad A.R. (B) shwa ban pynmih ïa ka jingpynbna na bynta kano kano ka post ka ba lait.
