SHILLONG:
Ka lympung Weiking, Jaïaw, mynta ka janmiet ka la shat thaba khriak da ka bor jong ka bording, namar ha kine ki ar sngi, ka Cultural Committee, ka Seng Khasi Kmie bad lyngba ka jingkyrshan jong ka tnad jngoh kai pyrthei ne ka Tourism jong ka sorkar jylla, kin pynlong ïa ka tamasa tamahoi kaba ai kyrteng “Na Thymmei Festival”, kaban long ha ka 19 bad 20 tarik Naiwieng 2022.
Ka jingpynkhreh hi ka long kaba radbah, namar ka jingtrei ïa ka kam ruh ka long kaba bun, naduh ban thaw ïa ka rynsan kaba thymmai bad ha kine ki ar sngi, ki prokram ba la pynkhreh ki long ba la sdang shuwa da ka jingpyni lyngba ka ‘sound bad light show’, jong ka phlim ‘Ka Hok Ka Shi Kyntien’, kaba la shna bad pynwan dur janai ïa ka tynrai jingwan ban longbriew u khun Hynñiewtrep Hynñiew Skum Hynñiaw Wasa, sha kane ka sla jong ka pyrthei. Ïa kane ka phlim la bsut da ki kyntien ha ka ktien phareng bad yn pyni ïa ka ha baroh ar sngi jong kane ka prokram ha kaba yn bynraplang pat ruh bad ka jingpynlong ïa kawei na ki jingïakob, kata ka dei ‘Ka Lukhimai bad Nai Khatsaw Synñia’.
Yn don ruh ka jingpyni ïa ki jingshad bad ki sur jingrwai ban wan ban ai da ki khun samla ka Seng Khasi bad Seiñ Raij Shillong, kiba ym juh da kham ïohsngew ne bna koit ïa kum kine, pynban kiba dang ri dang sumar kyndong pat ïa ki da ki longdien kiba mynta.
Haba ïadei bad kane, ka Seng ka shim ïa kane ka kabu ban kyntu bad ïalap ïawer ïa baroh ki nong shong shnong ba kin wan sha lympung ha kine ki ar sngi, ha kaba kan nym don satia ka jingkhrong bai rung, bad ka jingpyni ka long ban ïoh ban peit ban sakhi ïa kaei kaba don ha lyndet jong kane ka prokram. Kan long ka jingsakhi ba haduh katno ba ka jaidbynriew Hynñiewtrep, Hynñiewskum ka don ïa ka spah bah jong ka La Riti ba janai (culture) ban pynpaw shakhmat jong ka pyrthei.
Sa shisien ka Cultural Committee Seng Khasi Kmie ka wer bad khot sngewbha ïa phi ki para kur, para kha, para kher, para mer, ban ïawan ban sakhi bad khmih ïa kine ki ar sngi, ki programme namar kan dei ka rneng bad ka spah lum jingtip kaba kordor ka ban lah ban lum bad ban ïoh rah rneng sha la ïing, la sem.
