MAWKYRWAT:
Ki nongot doh Masi ha ïew Mawkyrwat ki la sdang biang ban die dohmasi ha ïew Mawkyrwat South West Khasi Hills District hadien ba ki la sangeh ban die ne ot dohmasi la kumba 2 taïew tam eiei naka daw ka jingwan lynshop ka jingpang Lumpy Skin Diseas (LSD) ïa ki Masi.
Naka liang u Bah Pailan Ramsiej, President jong ka Association Nongotdoh Masi ha ïew Mawkyrwat u la pynshai paidbah ba kane ka jingsangeh ban ot dohmasi ha kine ki ar taïew bala dep ka dei lyngba ka jingïohpang ki masi ha kaba ki briew ki la duna ban wan thied ïa ka dohmasi na ki dukan jong ki kumta naka liang ka Association nongotdoh kila ïa rai ban hap ban sangeh shwa ban die doh masi kumba ar taïew eiei.
Hadien ba kila sa ngeh otdoh mynta ka lah sngi U Bleil, ka 19 tarik Jylliew 2023 kila sdang biang ban ot dohmasi da kaba ki ot tang ïa ki masi ki ba koit ba khiah ki bym shem la don kino kino ki dak jingpang haki.
Naka liang ka Association Nongotdoh Masi lyngba u president, u Bah Pailan, ki la kyntu ïa ki paidbah ba kimdei ban sngew sheptieng ban bam ïa ki dohmasi namar baroh ki dohmasi ki dei ki ba biang kiba khlem don kino kino ki jing pang. Shuh shuh u la ong ruh ba kum ka Association kam shah ïa ki nongdie masi bad ïa ki nongthied ba kin wan die ne thied ïa ki masi ba la don ki jingpang bad naka liang ka Association lada ka lap ïa kiba pynkheiñ katkum ba kila bthah kan sa shim ïa ka rai ban leh ei ei halor kita kiba pyrshah ïa ka Association.
