SHILLONG:
U nongwad Right to Information (RTI) ka jylla, u Bah Disparsing Rani, ha ka 14 tarik Lber u la pynshai paidbah halor ka kaiphod kaba u la ïoh lyngba ka jingwad RTI jong u halor ki lai tylli ki mat, kiba kynthup ïa ka T.50,000 na ka bynta kiba la khlad na ka daw jong u khñiang jingpang COVID, ka jingdon ki post ha North Eastern Hill University (NEHU) bad ha Institute of Hotel Management (IHM), bad ka jingpynsangeh ïa ka skhim Pradhan Mantri Ujjwala Yojana (PMUY).
Ha kaba ïadei bad ka pisa kaba dei ban ai sha ki bahaïing jong kito kiba la khlad na u khñiang jingpang COVID, U Bah Rani u la ïathuh ba u la pan ïa ka RTI halor kane la kham slem hynrei u la ïoh ïa ka kaiphod ha ka 7 tarik Rymphang 2023. U la ïthuh ruh ba katkum ka jingbthah ka Supreme Court jong ka Ri India ha ka 30 tarik Jylliew 2021, la bthah ïa ka National Disaster Management Authority (NDMA), lyngba ka State Disaster Response Fund (SDRF), ban ai T.50,000 sha ki bahaïing jong kito kiba la khlad na u khñiang jingpang COVID. U la ïathuh ruh ba ka Disaster Management ka sorkar jylla lyngba ka kaiphod ba la phah sha u, ka la pyntip ba la dep ai lut ïa ka pisa sha kito ki bahaïing jong kiba la khlad na u khñiang jingpang COVID. Ka pisa ba la ai ka poi haduh T.6,66,00,000. Hynrei u Bah Rani u la ïathuh ruh ba ki don kiba la ujor sha u ba kim pat ïoh ïa kata ka pisa bad u la kyntu ruh ïa kito ki bym pat ïoh ba kin pyntip sha u khnang ba un leh ïa kaba donkam, lane ki lah ban leit sha ka Revenue Disaster Management, Government of Meghalaya, ban leit pan ïa ka hok jong ki na ka bynta kiba haïing jong ki kiba la khlad na u khñiang jingpang COVID.
Ha kaba ïadei bad ka jingthylli ki post bapher bapher hapoh NEHU, u Bah Rani u la ïathuh ba ha NEHU ki don ki nongtrei casual workers bad ki contractual workers ki ba shah siew ha ki lai bynta. U la ïathuh ruh ba haduh mynta, ki don 134 tylli ki post ba lait ei kata ha ka Group B bad C post. U la ïathuh ruh ba ka don ka jingujor na ka Department of Journalism and Mass Communication, ha kaba kane ka department kam shym la don ïa ki tiar ki ba biang ha kaba ïadei bad ki practical ban ai jinghikai sha ki khynnah. U la ïathuh ruh ba u la phah ïa kane ka jingujor sha Delhi hynrei na ka liang ka NEHU kam pat shym la ai ïa ka kaiphod halor kane ka RTI haduh mynta.
Ha kawei pat ka liang, u Bah Rani u la pynpaw ruh ba ka Institute of Hotel Management (IHM) hapoh ka Ministry of Tourism, Government of India, ka don haduh 10 tylli ki post ba thylli, ha kaba ka post jong u Principal ruh ka thylli. Shuh shuh, ki post ba thylli ki kynthup ïa ka post jong Assistant Administrative Officer, Office Superintendent, Lecturer, 2 tylli ki post Assistant Lecturer, Teaching Associate, LDA bad kiwei kiwei. Kane ka pyni ba ym shym la don ka Sanctioned Post. U la ïathuh ruh ba ïa mynta, i ba bat ïa ka kam Principal i dei i Dr. B Khashiïing, i ba long i incharge. U la ong, “La ïoh jingtip ba wat ki tulop ba siew ïa ki nongtrei contractual kim biang, kaba ki nongtrei kim ïoh ïa ka jingsiew kumba la mang napoh Delhi.”
Ha kaba ïadei bad ka skhim Pradhan Mantri Ujjwala Yojana (PMUY), u Bah Rani u la ïathuh ba kane ka dei ka skhim ban ai ei ïa ki gas na ka bynta kito ki longïing kiba duk kiba don ïa ka BPL card. U la ïathuh ruh ba katkum ka jingïakren jong u bad ka Longkmie Gas Agency kaba don ha Laban, ki la ïathuh ïa u ba la pynsangeh shwa ïa kane ka skhim, hynrei kim shym la pynshai na kino ki daw ba la pynsangeh. U Bah Rani u la ïathuh ruh ba katkum ka kaiphod ba u la ïoh na ka Hindustan Petroleum Corporation Limited (HPCL) halor kane ka skhim, ki briew kim donkam ban siew pisa na ka bynta ban ïoh ïa kane ka skhim. Kumta u la ong ba ki Gas Agency ki dei ban pynshai halor ka daw ka jingpynsangeh ïa kane ka skhim namar katkum ka kaiphot ba u la ïoh, kam don kata ka jingpynsangeh ïa kane ka skhim.
