SHILLONG:
Ka Hill State People Democratic Party (HSPDP) Youth Wing mynta ka sngi ka la lum ïa ki nongshong shnong ha ka jylla ban pynlong ïa ka jingïalangbah ban ïatai halor ka phang, ‘Khasi Jaiñtia State” kaba la long ha Dinam Hall, Jaïaw Shillong.
Ha kane ka sngi la wan ban pynshai ïa kane ka phang da u Bah Robertjune Kharjahrin (Advocate bad Social Activist) bad u Dr. L.S Gassah (Retired Professor), u Bah K.P. Pangniang (President HSPDP Central Body) bad kiwei kiwei.
Haba kren ha kane ka sngi, na ka liang u President ka HSPDP u Bah K.P Pangniang u la ong ba kane ka dei ka por, ban buh ka jingkynmaw ïa ka jingdap 60 snem ka party, ‘watla ka dang dap 55 snem mynta; khnang ba ki briew kin tip ba kane ka jingdawa ka dei ka lynti ïaid ka party na ka bynta ka jaitbynriew’.
“Ha ka por ba ka party ka la dap 35 snem, ki la don ki khep ba u maieid Hopingstone Lyngdoh, bad ki nongïalam na rilum Garo ki la pynlong ïa ka jingïalang hapoh ka jingïalam u Clifford Marak ha Tura, da kawei ka sur ki la pule ïa ka dorkhas ha ka 29 tarik u Risaw, ban dawa ïa la ka jong ka jylla, kaba la soi da u Bah Hopingstone Lyngdoh bad u Clifford Marak ban phah sha ka sorkar pdeng,” la ong u Bah Pangniang.
U la bynrap shuh shuh da kaba ong, “Kane ka jingïalang ka don ïa ka jingthmu kaba hapoh ka jingtyllep jong kiwei ki nongïalam. Hato kata ka jingphohsniew ïa ka Khasi-Jaiñtia State ka dei kaba phohsniew mynmiet ne mynsngi, don ba kylli ïa ngi.”
U la ïathuh ruh ba ha ka 12 tarik mynta u bnai, ki dkhot jong ki jylla, kiba don ha ki thaiñ shatei lammihngi, “Kiba don kajuh ka jingdawa ïa ka jylla thymmai hapoh ka lama jong ka ‘National Federation of New State’, kiba dei ki nongïalam jong ka Karbi Anglong na Assam, ki nongïalam ka Kukiland na Manipur, ki nongïalam na ka jylla Tripura bad ki nongïalam ka Bodoland kin wan sha ka jylla Meghalaya, ngin pynlong ïa ka jingïalang ha Mawphanlur.”
Katba ha ka sngi ba bud, kata ha ka 13 tarik, ki 18 tylli ki kynhun kiba don hapoh ka shatri jong ka ‘National Federation of New State’, kin ïaleit lang sha New Delhi ban dawa ïa ki jylla thymmai. “Ngin leit sha Delhi ban dawa ïa ka Khasi-Jaiñtia State hadien ba ngi la pyndep ïa ka jingbishar bniah na la ka jylla,” la bynrap u Bah Pangniang.
