SHILLONG:
Ki bahaïing jong u nongïalam barim ka kynhun kiengatiar ka Hynñiewtrep National Liberation Council, u Bah Cherishstarfield Thangkhiew, u ba la khlad noh na ka jingshah siat ïap ha ki pulit, mynta ki la leit ban tied ïa ka jingkhang jong ka ïingbishar High Court jong ka jylla Meghalaya na ka bynta ban shim ïa ka sienjam ban pynshitom ïa ki pulit ki ba donkti ha kane ka jingjai.
Ïa kane ka jingmudui, la ai da u Bah Granary S Thangkhiew, u para trai jong u Bah Cherishstarfield. Ka ïingbishar ha ka jingbishar ha ka sngi Balang ba la tian bishar da u Bah TT Diengdoh, u senior counsel assisted bad u R. Kharsyad, counsel u ba mih khmat na ka bynta ki nongmudui bad na ka bynta baroh ki nongshah kynnoh la wan mih da u Government advocates u S. Sahay bad u E.R Chyne.
Katkum ka jingujor na u nongmudui la kdew ba hadien ba la dei ban file ïa ka ejahar ha ka 18tarik u Nailar, 2021 bad ïa ka mokutduma la register ha Mawlai police station bad kumjuh ïa ka kaiphod jong ka jingtohkit ka ba la dep ban aiti ha ka 19.05.2022, sha ka jylla na ka One Man Enquiry Commission, u nongmudui bad ka ïing ka sem kam don jingtip eiei shuh kaei ka ba ki la leh halor kane ka bynta.
U Sahay u la aiti, shibun ki kyndon ki ba hap ban shim haduh mynta na ka bynta ban tohkit bad ban shim rai ban pynshitom ha ka ba ïadei bad kine ki pulit, bad un ailad ruh ban shah ban wanrah ïa ka status report bad kiwei ki jingdonkam ha ka dur ka affidavit, hapoh ka 4 taiew ha ka 14 tarik u Jylliew halor kane ka bynta yn sa shong bishar biang ha ka 13 tarik Naitung.
