SHILLONG:
Ka khubor jong ka jingshah dung jong u wei u dkhot ka Hynñiewtrep Integrated Territorial Organisation (HITO) ka la pynsmiej bad pynpar ñiangkhriat ïa ki paidbah ka jylla.
Kane ka jingjia ba shyrkhei kala jia ha ka miet jong ka 9 tarik u Lber 2023 ha ka shnong Sohshrieh Mukhla ha kaba la kynnoh ba ar ngut ki briew kiba la tip kyrteng kum u Damut Bang bad u Palmon Sari ki la thmu ban shim ïaka jingim jong u Solomon Rymbai.
Na ka liang u Para jong u bah Solomon, u Pynbiang Rymbai ula leit ban ujor da ka ejahar pyrshah ïa kine ki arngut ki briew ha Ummulong Police Beat house, ha u la ïathuh ba ha 9 tarik u lber 2023 ha ka por kumba 7:30 janmiet u Damut Bang bad u Palmon Sari kiba dei na ka shnong Ladmukhla West Jaiñtia hills ki la dung ia u Solomon Rymbai na ki bynta ka kpoh ha Mukhla Sohshrieh.Hadein kane ka jingjia la pynkit noh ïa u bah Solomon sha Jowai KJP Hospital ban ïoh jingsumar.
Na ka liang ki nongïalam jong ka HITO kila pynrem jur halor kane ka jingshah thombor jong u dkhot ka seng, ha kaba ki la ong kum ki dkhot jong ka jaitbynriew kiba trei na ka bynta ka bha ka miat jong ki khun samla, hynrei lada phai sha ka wei pat ka bynta ki don ki para doh para snam jong ngi kiba la ïaw ka jingmut jingpyrkhat, hynrei ki shim pat da kumwei da kaba kdew kti bad kynnoh ba kiba ïa khih ïa ksar na ka bynta ki daw bah jong ka jaitbynriew ki kylla lang kñia pynban.
Na ka liang ka HITO kala maham ba ym dei ban shim kabu ïa ka jaitbynriew kaba don tang shitroh da kaba kamai spah shimet khlem da pyrkhat ïa ka saw ka sian jong ka ri bad ka jaitbynriew.
Kine ki nongïalam kila ong ruh ba hakum kine ki por kiba ka jaitbynriew ka donkam ïa ki ‘riew len lade ki ban lam lynti, dei ban long kiba stad bad kiba shemphang ban ïaid ha ka lynti jong ka hok bad da ka jingkhuid.
“Ngin wan rah ïaka jingïatylli hapoh ka ri khasi baieid jong ngi, ban lait na ki jingshah thombor bad shah pynïap ïa ki para doh para snam jong ngi,” ki la ong.
Ki la bynrap da kaba ong, “ Lada ngi leit bad pynkulmar hapoh ka ïing ka sem jong une u ba dung, ïa u dkhot jong ngi kam pynsuk ïa ngi namar kan pynsyier ïa ki khun ki kti jong u.”
Shuh shuh ki la ong ba lada ka aiñ kam shim khia kim ban se ban thom ïaka sang, long katba long jia kat ba jia.
Ki nongïalam ka HITO ki kitbok kitrwiang ïa u Solomon ba un ïoh kloi ïaka jingkoit jingkhiah.
