SHILLONG:
Ka jingïohkem drok ki pulit ka jylla ka la nang bteng katba nang mih ki sngi ki por ha kaba ha ka 15 tarik Lber ha ka por step phyrngap, hadien ka jingïoh jingtip kaba thikna, ki pulit ka East Jaiñtia Hills District, kata ha ka por 3 baje mynstep, ki la ïohbat ïa kawei ka kali Maruti Car (private) kaba don ïa u No. ML-05-D-3783 ryngkat lai ngut ki briew, kiba la tip kyrteng kum u Rudolf Fanklin Lyngdoh (28), u Shemphang Lakhiat (29) bad u Aibankyrshan Kharlyngdoh (24).
Kane ka kali ka dei kaba wan na Silchar ban leit sha Umsning, hynrei da ka jingpynap shrip ki pulit ka East Jaiñtia Hills ha ïew Ladrymbai, NH-06, ki la ïoh ban bat noh ïa kane ka kali maruti bad hadien ba la dep leh ïa baroh ki jingdonkam ha ka jingdonlang ki sakhi, ki pulit ki la talasi ïa kane ka kali bad la ïoh ban kurup ïa lai tylli ki synduk sabon kiba don ïa u powder ba long rong stem rong soh ba la thep ha kawei ka pla kieng bad ba la song bha da ka plastik rong stem. Hadien ka jingleh test ki pulit ki la shem ba une u dei u drok heroin uba don ka jingkhia kaba 32.5 gram.
Ha kaba ïadei bad kane ki pulit ki la pynngat hapoh ka kyndon jong ka NDPS Act bad la register hapoh Khliehriat Police Station bad ki pulit ki dang pynlong ka jingtohkit ban lap shuh shuh sa ïa kiwei pat kiba donkti ha kane ka kam beaiñ.
