JOWAI:
Ka jingïaid rally mynta ka sngi ha Jowai ba la khot pynlong da ki san tylli ki sengbhalang kiba kynthup ïa ka East Jaiñtia National Council (EJNC), Jaiñtia Student Union (JSM), Hynñiewtrep Youth Council (HYC), Confederation of Ri Bhoi People (CoRP) bad ka Hynñiewtrep Achik National Movement (HANM) ryngkat kiwei de ki seng kiba la wan iasohlang kala ïaid beit ïaid ryntih khlem da don kino kino ki jingthut, hynrei ka bor pyniaid jong ka bor District ka la khanglad ia ki paidbah nongleit nongwan da kaba ailad ba kine ki nongialam seng kin ioh ban pyndep ia ka jingthmut jongki.
Ïa kane ka jingïaid rally la sdang na madan Mihmyntdu bad ïaid shaduh sha Iawmusiang ha stand Ummulong hajan ka Jowai Police Station ha kaba la wan ban ïashim bynta da ki spah ngut ki dkhot Sengbhalang, hangne kila pynlong ka jingïalang halor ka nongrim ban pynbor ïa ka Sorkar MDA ban pynurlong noh ïa ki 9 tylli ki mat jingdawa jong ki 5 seng kiba hap hapoh ka ‘Save Hynñiewtrep Mission’.
Kine ki 9 tylli ki mat jingïakhih ka ‘Save Hynñiewtrep Mission’ ki long halor ka jingpyntreikam noh mardor ïa ka Inner Line Permit (ILP) hapoh ka jylla, ban pynrung ïa ka Ktien Khasi hapoh ka kyrnit kaba Phra ka Riti synshar ka Ri India, ban pynbeit ia biang soskular (MoU) ba la dep ïasoi hapdeng ki ar jylla, ban pynkynriah noh ia ki nongtrei sorkar bad beh mardor ïa ki kharmator ba shong beaiñ ha ïewmawlong, ban pynbeit thymmai ia ka policy thungkam hapoh ka jylla kaba noh shilliang, ka jingtohkit ka CBI ha kaba iadei bad ka kam bamsap hapoh ka jylla, ban tohkit da ka CBI ban pynshitom ia kiba donkti siat ïap ïa u Cheristerfield Thangkhiew, ban thung kam noh mardor da ka lynti ba dei ïa baroh ki kam ba dangsah hapoh ka jylla bad ban dawa weng nong ïa ka jingwanrah ïa ka jingkhalai Casino hapoh ka jylla.
