NONGSTOIÑ:
Ka long kaei kaei kaba sngewsih bad pynkyndit ruh ïa kiba bun ban tip ba ïa ki tiar ki tar jong ka jingdonkam kaba la mang na ka bynta ka Maternity & Child Hospital kaba don hapoh ka shnong Upper New Nongstoiñ WKHD, la shu rah bad pynkynriah noh sha kiwei pat ki Hospital kiba don ha kiwei pat ki District.
Katkum ka jingïoh jingtip la ong ba ka jingtei ïa katei ka MCH Hospital ha Nongstoiñ la lah ban pyndep ïa ka jingtei la kumba 3 snem eiei ïa kaba kiba bun ruh ki paidbah nongshong shnong kila ap khmih lynti ban ïoh plie paidbah noh ïa katei ka Hospital.
La ïoh jingtip ruh ba ha u bnai Naiwieng jong u snem 2022 ka tnad ka koit ka khiah kala mang pisa ban thied ïa ki tiar ba donkam ha katei ka Hospital hynrei kaba sngewsih pat ka long ba ha 23 tarik Jymmang 2023 ar tylli ki trok kila wan ïeng ha katei ka Hospital ban sei noh ïa ki tiar ki tar ïa kaba la lah ruh ban pyntikna ba ïa kitei ki tiar la rah bad pynkit noh sha ka Civil Hospital Mawkyrwat.
Ki ophisar ka tnad District Medical & Health Officer WKH kila kyntait ban ai jingkren eiei halor katei ka bynta hynrei don pat kiba la shu pynpaw ïa ka jingsngew duhnong kaba khraw namar ba kan sa shimpor biang sa kumba 4 snem eiei ban sa ïoh mang pisa ban thied biang ïa ki tiar lada u nongmihkhmat um lah ban buddien bad pynbor ïa ka sorkar.
Ha kaba ïadei bad kane ka bynta ki riew paidbah ka thaiñ Nongstoiñ kila pynpaw ïa ka jingsngewsih kaba khraw ban shu shah knieh jyndat noh ïa ki tiar ki tar jong katei ka Hospital kaba la ap khmih lynti sa tang ban ïoh plie paidbah noh na ka bynta ka jingmyntoi ki longkmie bad ki khyllung jong ka District hi baroh kawei.
