JOWAI:
Ka Khasi Student Union (KSU) East Jaiñtia Hills District, ha kane ka taïew ba lah dep, ka la ïoh ban ïakynduh bad buh ruh da ka jingthoh ha u Deputy Commissioner ka East Jaiñtia Hills District, halor ka jingshah kyntait ki katto katne ki khun samla ba pyrshang ban pynrung ïalade ha ka thup pynrung kam ba la pynlong da ka tnad Civil Defense bad Home Guard.
Ka KSU EJHDU marsien ïoh jingtip halor kane, ka la leit mar mar ban ïakynduh ïa u DC ka East Jaiñtia Hills District ban pynsngew halor kane ka jingbymshai ka rukom thung kam. Lah ban pynkynmaw ruh ba kam don ka jingmih ïa ka Advertisement ne jingpynbna halor kane ka lait kam ha kino kino ki kot khubor bad na ka liang u DC ruh ym shym la tip ei ei halor kane.
Ka seng ka dap da ka jinglyngoh ban ïohnsgew ba kat u khlieh ka District um shym la tip ba ïaid kane ka jingthungkam ha katei ka tnad sorkar. Ka seng ka la dawa na u DC ba un wad bniah halor kane bad ban tuklar syndon ba kan don ka jingthungkam ba khuid ba suba khnang ba ki samla ka thaiñ kin ym duh ïa ka hok ka jong ki. Na ka liang u DC u la kular ban shimkhia mardor halor kane ka mat bad ban pynbeit ïa ki jingdonkam.
