NONGSTOIÑ:
Ha kawei ka jingjia kaba sngew triem, sngew saitmet bad bym lah pdiang ha ka imlang sahlang, kawei ka longkmie kala shah leh beijot bad shah pynïap dusmon ha ki runar bad riew thrangsnam myn ha ka step phyrngab jong ka 14 tarik u Rymphang hapoh ka shnong Riangpoit ka shnong kaba don ha ki thaiñ Risiang jong ka West Khasi Hills District.
Katkum ka tyllong khubor bala ïoh na ki heh pulit jong ka District la ong ba katei ka jingjia la antad ba ka la jia ha kapor kumba 6:30 eiei jong ka step sngi ba ar katba ka dang mih nala ïing ban leit sha khlaw ba ka ju trei ju ktah ha ka kam thang rnga ka jong ka.
Kaba kham sngew sangsot shuh shuh ka long ba la ïathuh ruh ba katei ka longkmie kadei ka riew kynthei kaba don 5 ngut ki khun bad ka ju im sngi da kaba thang rnga bad kaju sahmiet ruh ha khlaw teng teng ryngkat ki khun, hynrei ha katei ka step kala mih na ïing ban leit biang sha khlaw ban pyndep ïa la ka kam pynban kala shah thombor noh ha lynti.
Kane ka longkmie kaba la shah pynïap dusmon ha ki riew thrangsnam kadei kaba la tip kyrteng kum ka Mitelda L. Marshyllong 38 snem ka rta na ka shnong Riangpoit WKHD.
Ha kaba ïadei bad kane ka jingjia naka liang u hymmen jong katei ka longkmie u la leit ban ujor ejahar ha thanad Nongstoiñ bad ki pulit ka Nongstoiñ ki dang pynlong ïa ka jingtohkit bad thwet jur ruh ïa ki riew thrangsnam kiba don kti ban pynïap dusmon ïa katei ka longkmie.
