NONGPOH:
Ki paidbah nongshong shnong ka shnong Umrit, Ri Bhoi mynta ka sngi ka 8 tarik Jylliew ki la mih ryntih ban kem ïa kiba suba dei ki ‘men ai ksuid bad ki ba la donkti ban leh ki kam sniew da kaba shu phah kñia.
Ki nongshong shnong ki la pynshitom ïa ar ngut ki longkmie kiba suba ai ksuid ryngkat uwei u rangbah ba la suba ba u dei u nongkñia da kaba ki la shah pynïaid kjat bad shah pynkieng tin kum ka dak ban pynjemdaw ïa ka jingthmu ba sniew ba ki don.
Ki nongshong shnong ki la ïathuh ba la don ar ngut ki longkmie kiba la leit sha uwei u briew uba na Umka-dhor ban phah kñia, bad na ka liang utei u briew u la ai ïa ki pylleng bad bthah ïa kitei ki longkmie ban tep ha khmat jong ka Ïingdorbar.
Katkum ba la ïoh lum jingtip, ki paidbah ki la ong ba ka long kabym poi pyrkhat ba kitei ki longkmie kin leh ïa katei ka kam, hynrei la shu tharai ba ka don ka daw kaba rim ha kaba ki la ïakyn-ad bad no re bad no kaba la pynlong ïa ki ban shim da kane ka sienjam.
Na ka liang u Secretary ka shnong Umrit u la ïathuh ba kum ki parashnong parathaw, ki ju ïaleit ïawan bad ïarung ïamih barabor, kumta ka long kabym poi pyrkhat bad kaba pynkyndit haba ki la leh ïa katei ka jait kam.
U la ong, “Kum ka shnong ngi kyntu ïa kiwei pat ki paidbah ba haba don kano kano ka jingïakynad, ym ju dei ban leh da kane ka rukom kata da kaba shu ai ksuid.”
“Kane ka jingleh ka jong ki, ka pynlong ïa ngi kum ka Shnong ban shim ïa kane ka sienjam ban ai jingsneng khnang ba kiwei pat kiba thmu ban leh sniew kin ym nud shuh, ha kajuh ka por kum kine ki jingleh ka long ka bym lah satia ban pdiang” la bynrap u Secretary ka shnong Umrit.
