SHILLONG:
Ha ka 11 tarik u Ïaïong, ar ngut ki nongïalam rangbah ka Balang Presbyterian Laitumkhrah, kata u Pastor Reuben G Laloo bad u Tymmenbasan T Nongkhlaw, ki la shah thombor ha ki runar katba ki dang don ha ka lynti ban leit sha ka lyngkha trei jong ka Balang ban ïakynduh ïa ki missionary kiba don hapoh Bihar.
U Pastor Reuben G Laloo jong ka Balang Presbyterian Laitumkhrah, u ba long uwei na ki dkhot u ba la shah thombor ha ki katto katne ngut ki runar, haba ki dang don ha ka lynti ban leit sha ka kawei ka lyngkha trei jong ka Balang, ha ka jylla Bihar, u la pyndonkam da ka rynsan jong ka WhatsApp ban pyntip halor ka jinglong jingman jong u hadien ka jingshah thombor.
Ki ar ngut ki nongtrei balang ka Laitumkhrah Presbyterian u Pastor Reuben G Laloo bad u Tymmenbasan, u bah T Nongkhlaw, ki la shah thombor ha ki katto katne ngut ki riewsniew ha ka 11 tarik u ïaïong 2023 ha ka jylla Bihar.
Kat kum ka jingpyntip u Pastor Laloo, ka long ba, “Ban pynthikna, ba ngi don ha ka met ba shait ba khlain da ka jingisynei u Blei, Ngin wanphai mynta ka miet sha la ïing.”
Kat kum ka jingtip ba la ïoh ka long ba, kine ki arngut ki nongïalam niam, ki la mad ïa ka jingbitar u paidbah bad hadien la ïalam noh ïa ki sha Police Station.
Hapdeng kane ka jingjia ka la don ka jingïakren bad ki heh sorkar na ka jylla Bihar ban peit halor ka ne ka jingjia, haba ïa dei bad kane ka jingjia u Myntri rangbah ka jylla u Conrad K Sangma u la shimkhia ïa kane ka bynta ban pynthikna ïa ka jingbit jingbiang jong kine ki nongïalam niam .
U Myntri rangbah ka jylla u Conrad K Sangma, u la pynpaw ïa ka jingpynrem lyngba ka ladpathai khubor jong u Twitter ,bad ong, “ngi pynrem halor kane ka jingjia ha ka jylla Bihar, ha kaba ki nongïalam niam jong ka Balang Presbyterian ki la shah leh tohmet ha ki riew bymman .U la bthah ruh ïa ka tnad pulit jong ka jylla Meghalaya ba kin shim jingtip ha ryngkat ka jingïatreilang ki pulit ka Bihar halor ka jinglong jingman kine arngut ki riewniam, ïa ka kyrwoh la dep ban shim ban ïoh ban ujor ïa ka ejahar pyrshah kine ki riewbymman”.
