TURA :
U Myntri ka tnat ka koit ka khiah ka sorkar jylla u James P K Sangma u la plie ïa u maw nongrim na ka bynta ban kyntiew ïa ka Kharkutta Primay Health Centre (PHC) sha ka Community Health Centre (CHC) ha North Garo Hills ha kine ki khyndiat sngi ba la dep. Ïa une u mawnongrim la plie ha ka jingdonlang u Timothy D Shira, uba long u symbud lamphang bad u MLA ka Resubelpara, bad kumjuh ruh u MLA ka Bajengdoba bad Kharkutta, u Pongseng Marak bad Rupert Momin.
Ha ka jingai jingkren kum u kongsan, na ka liang u Myntri ka sorkar jylla u James P K Sangma u la ong ba ka jingtynjuh ka dei kaba la ban bha ha ka por ba wan ka khlam COVID 19 bad kane ka la pynlong ïa ka sorkar ban kyndit bynriew halor ka jingdonkam ba kham kynsai ha kaba ïadei bad ka tnat ka koit ka khiah.
Ka jingdonkam ban sumar ïa kiba bun ki nongpang, ka jingkyntiew ïa ki PHC sha ki CHC, ka jingpynjanai ha ki sub centre bad ka jingpynkhlaiñ kine ki jaka ai jingsumar ki long ki kam ba kongsan bad ba hakhmat jong ka sorkar jylla khnang ba lah ban ai ka jingshakri kaba thikna na ka bynta ki paidbah jong ka jylla ha ka liang ka koit ka khiah. Ka jingbanbor ba khlem shongthait jong u MLA ka Kharkutta, u Rupert Momin halor ka jingdonkam ban kyntiew noh ïa ka Kharkutta PHC sha ka CHC bad ban sngewthuh halor ka jingdonkam ba hakhmat na ka bynta ki paidbah ka paw ba ka long kaba kongsan halor ka jingkyntiew ïa ka PHC sha ka CHC, la ong u James P K Sangma.
Ynda la pyndep ïa ka jingshna ïa kane ka CHC, kane ka hospital kan kynthup ka jingdon saw tylli ki jaka ai jingsumar ba kyrpang, bad yn ïoh ruh ki tiar pyndonkam kiba janai bad baroh ki jingthiah kin don 30 tylli. Hadien kane na ka liang u Myntri ka sorkar jylla u la pyntip ruh ba shen ka jylla kan sa ïoh la ka jong ka medical college ha nongbah Shillong khnang ba lah ban pynbiang ki jingdonkam ki doctor bad kumjuh ruh kan don ka Recruitment Board halor ka jingthep kam ha ka por kaba biang na ka bynta ki doctor bad ki nurse.
Ha ka jingkren pynkut u James P K Sangma, u la ong ba watla ka sorkar kan ai ïa baroh ki jingdonkam na ka bynta ki paidbah ha kaba ïadei bad ka koit ka khiah hynrei ka bha ka miat jong ki briew hi ka don ha kti jong pa uwei bad halor kane, u la kyntu ba ki briew kin jied ka rukom im kaba lah ban tei na ka bynta ka koit ka khiah.
Na ka liang u MLA ka Kharkutta uba long ruh u Chairman MNREDA, u Rupert Momin ha ka jingai jingkren u la ong ba ka jingkyntiew ïa ka Kharkutta PHC sha ka CHC kan lah ban weng ka jingeh ba ki briew ki ïakynduh ha ka liang ka koit ka khiah khamtam kito ki briew kiba kham duna ka ïoh ka kot jong ka imlang ka sahlang kiba ym lah satia ban leit shim dawai ne shah sumar ha ki hospital private kiba don kham shajngai kum ha Assam la ka long ha Goalpara lane ha nongbah Guwahati. Hadien ynda la lah ban pyndep ïa ka CHC hospital yn sa sakhi ki jaka ai jingsumar kiba kham janai.U Momin u la pyntip ruh ba hashuwa kane ki don shibun ki jingeh kiba la kynduh na ka bynta ka jinglah ban ïoh ïa ka CHC hynrei lyngba ka jingïarap noh synñiang jong u Rangbah Shnong ka Chiwaki, bad shen yn sa sakhi ka jingurlong halor ka jingangnud jong ki paidbah.
Kiwei de kiba la ai jingkren ha katei ka sngi plie mawnongrim ki kynthup u Timothy D Shira uba long u symbud lamphang bad u MLA na Resubelpara bad u R N Sangma, ADC In – Charge Deputy Commissioner, North Garo Hills, Dr S Boro, DM&HO bad u Philifort Marak, u Rangbah Shnong ka shnong Chiwaki.
