SHILLONG:
U Myntri Rangbah ka Jylla, u Conrad K Sangma, ha ka 4 tarik Naitung u la kynduh ïa u Myntri ka Ministry of Education ka sorkar pdeng u Dharmendra Pradhan ha Nongbah Delhi na ka bynta ban buh ïa ka jingkyrpat ba kin buh lang ïa ki Common University Entrance Test (CUET) centre ha baroh 12 tylli ki District ka Jylla Meghalaya.
Mynta ka sngi u Myntri Rangbah ka Jylla u Conrad K sangma ha ryngkat u Myntri ka Tnad Pule Puthi ka sorkar jylla u Rakkam A Sangma , u Adviser ka Tnad Pule Puthi ka Jylla u Bah Himalaya M Shangpliang ki la leit sha Delhi ban ïa kynduh ïa u Myntri tnad pule ka sorkar pdeng.
U Myntri Rangbah, lyngba ka social Media u la thoh, “La buh ka jingkyrpad ïa u Myntri ka Tnad Education ka Sorkar Pdeng, u Dharmendra Pradhan ban un ai ka jingbthah ïa ka Ministry of Educaton bad ka National Testing Agency (NTA) ba kin pynlong ïa ka eksam CUET ba kyrpang ïa kito ki samla pule ka Meghalaya kiba la duh ban ïaleh ïa ki eksam namar ka jingïoh ïa ki jaka ïaleh eksam shabar ka Jylla”.
U la ong ïathuh ruh ba ka Sorkar Jylla ka la buh ruh ïa ka jingkyrpad sha ka Sorkar pdeng ba kan ai ka jingmynjur ha ka ba ïadei bad ka jing buh ïa ki CUET Centre ha baroh 12 tylli ki District ka Jylla Meghalaya, ki ban don ha ki jaka pule kiba biang lut ki tiar ki tar ha kaban pynlong ïa ka eksam CUET.
U la bynrap ba, “Khnang ba ka Sorkar kan shimkhia ïa kane ka mat, ngi la ai jingbit ba kan buh ïa ka CUET Centre ha Shillong, Tura, Jowai, Nongstoin bad Williamnagar, ki ban kynthup lang ïa kiwei ki District ba marjan” .
Ha ka juh ka por na ka liang u Myntri Rangbah ka Jylla, u la kyrpad ruh ïa u Myntri ka Ministry of Education, u Dharmendra Pradhan halor ka jingwanrah ïa ka College of Teachers Education (CTE) ha Jylla Meghalaya.
U Conrad ula pyntip ba ka jingïakren halor kane ka mat ka long kaba seisoh, namar ba kane ka jingthmu ban wanrah ïa ka CTE ha ka jylla ka long namar ba don bun ngut ki nonghikai ki bym pat dep ïoh ïa ka jinghikai pyntbit namar ka jingduna ki jaka ai jinghikai.
U la ong, “Nalor kane, nga la kyrpad ruh ban pyndep noh ïa ka jinghikai pyntbit ïa baroh ki nonghikai jong ki skul Secondary bad Higher Secondary da kaba pynlong ïa kawei ka prokram hapoh ka IGNOU programme bad ïa ki nonghikai skul Elementary hapoh ka NIOS Programme”
U Myntri Rangbah u la pyntip shuh shuh ba, “Ka Sorkar Jylla ka la pynkhreh ruh ban pyntreikam ïa ka National Education Policy (NEP) bad halor kane ka Sorkar jylla kala pan ïa ka jingkyrshan na ka Sorkar Pdeng ban pynbiang ïa ki jingdonkam ki tiar ki tar ha ki skul hapoh ka Jylla”.
U la ïoh ruh ban ïa kren halor ka jingkyrshan ïa ka Jylla na ka sorkar pdenmg ha ka liang ka jingai song pisa hapoh ka SSA khnang b aka Jylla kan lah ban ïaid kat kum ki thong bad jingthmu jong ka NEP 2020.
“Nga la kyrpad ruh na ka Sorkar Pdeng ban thung noh ïa u Pro Vice Chancellor, Registrar, Finance Officer bad University Enigineer kiba la sah thylli ha North Eastern Hill University (NEHU) bad kumjuh ban thung noh ïa ki 200 tam ki kam nonghikai bad ki nongtrei kiba lait thylli hapoh ka University”, u la ong.
U la buh ruh ka jingkyrpad ha ka ba ïadei bad ka jingpynjynsur ïa ki kyndon jong ka PM-USHA scheme, ka ban ai jingmyntoi ïa ki University ka Jylla, kaba dang don ha ka jingsdang jong ka jingpyntreikam.
U Myntri Rangbah ka Jylla mynta ka sngi u la ïakynduh ruh ïa ki Dkhot ka International Solar Alliance (ISA) ha Gurugram, New Delhi bad ïasyllok halor ka sienjam ban lah pynmih bording na ka bor jong ka Sngi.
U Myntri Rangbah lyngba ka Twitter u la ong, “Ki buit treikam bala batai da ka ISA kan plie lynti ïa ngi ban shim ïa ki buit treikam ki ba ïasyriem na ka bynta ban pyntrei kam ïa ka CM Solar Mission hapoh ka Jylla”.
