MAWKYRWAT:
Ka ophis jong ka District Mission Co-ordinator, Sakmagra Shiksha Abhiyaan (SSA), South West Khasi Hills District, Mawkyrwat mynta ka sngi ka 12 tarik u ‘Nailur, 2023 ka la pynlong ïa ka jingïaid paidbah ne rally da kaba sdang na khmat ka Civil Hospital, Mawkyrwat bad ïaid sha ophis ka Community & Rural Development, Mawkyrwat Block, da kaba ïaid pat sha ïew Mawkyrwat bad pynkut ha Maharam Government Higher Secondary School, Mawkyrwat ban pynlong ïa ka jingrakhe ïa ka World Literacy Day 2023 bad pynsngewthuh halor ka jingpep skul shiteng por. U Bah Staising Kharbteng, Sub Inspector of Schools, Mawkyrwat u la ka weh ïa ka lama kum ka dak ban plie ïa kane ka jingïaid rally kaba la ïashim bynta shitrhem da ki spah ngut ki khynnah skul ha ryngkat ki nonghikai.
Ha shwa ban kaweh ia ka lama kum ka dak ban plie ia kane ka jingiaid rally na ka liang u bah Staising Kharbteng u la ong ba ka imlang sahlang bad khamtam ki khynnah pule ki dei ban sngewthuh ba ka kyntien Literacy ka kdew ia ka jinglah ban pule bad thoh ha kaba iwei pa iwei na ki nongshong shnong ki don ka hok ban ioh ka lad ban leit sha ki jaka pule. U pynkynmaw ruh ba ka jingnang jingtip ban pule ka dei ban sdang na ki rympei iïng ban long ka nuksa ia ki khun ban sngewtynnad bad bang ban pule. U la ong ruh ba ki long u mawjingkieng ka jingkyrmen hapdeng ki jingeh kiba bun bad kan wanrah ki jingkylla kiba bun ha ka jingim jong ki khynnah pule ha ki sngi bad por ban wan ïa kaba ngin ym lah ban ïohi lypa.
Shuh shuh u ong ba ka jingnang jingstad kan ïarap ïa ngi baroh ba ngin don ïa ka bor pyrkhat ne Reasoning Power kaba khlaiñ ban shim ïa kano kano ka rai ha ka jingim jong ngi khlem da shah ïalam bakla ha kiwei. U la kyntu ruh ïa ki khynnah skul ba ki dei ban nang kumno ban pyndonkam ïa ki rynsan social media kiba pher bapher ki ban kyntiew ïa ka jingnang jingtip khnang ba ka lawei jong ki kan long kaba phyrnai da kaba kyntu ba kim dei ban shu ngeit kulmar lut ïa kiei kiei baroh kiba ki ïohi bad lap ha social media namar ka don ka por ba ki don ki jingshim kabu da ki riew thok riew shukor ïa kiba lui lui. U la pynshai ruh ruh ba ka long kaba donkam ba ki khynnah kiba la ïehnoh shiteng por ïa ki jingpule jong ki ban leit phai biang sha ki jaka pule na bynta ka jingmyntoi jong ki.
