SHILLONG:
Mynta ka sngi ka 14 tarik Nailur 2023, ka Committee on Safety Security and Cleanliness of Ïewduh jong ka Khasi Hills Autonomous District Council (KHADC) ka la pynlong ïa ka jingïalang ka ba nyngkong ban wad ïa ki lad ki lynti ban wanrah ïa ka khuid ka suba ha ki Ïewduh ka ba hap hapoh ka jingpeit ka council.
Ïa kane ka jingïalang jong ka Commitee la pynïaid da u chief executive member (CEM) ka KHADC u Bah Pynïaid Sing Syiem ha ryngkat ka jingïadon lang ka Executive Member ka tnad Market ka Kong Grace Mary Kharpuri, u Executive Member ka tnad Development u Bah Carness Sohshang lem bad ki nongïalam na ki 6 tylli ki shnong ba kynthup ka shnong Mawkhar, Umsohsun, Mission Compound, Wahthapbru, Qualapatty Riatsamthiah bad Wahingdoh, ki nongïalam ki nong shong ïew, ki nongïalam ki seng nongkhaïi, ki bor district bad ki bor pulit.
Haba kren sha ki lad pathai khubor u CEM ka KHADC u bah Pynïaid Sing Syiem u la ïathuh ba ha ka jingïalang jong na ka Committee la shim ïa ka rai ban mang pisa naka bynta ban tei kham bun ki jaka leit shabar bad ban maramot ïaki ki jaka leit shabar ki ba la i donkam ban pynbha ban maramot ïaki nala um bad ïaki Pipe um bala sniew ha Ïewduh. U CEM ula ïathuh ruh ba ka Committee ka la shim ruh ïa ka rai ban mang tyngka naka bynta ban thied ïaki CCTV bad ki Solar na ka bynta ban pynlong ïa ka Ïewduh ka ba shngaiñ na ka bynta ka ïaid ka ïeng ki briew hapoh ka ïew bad ki shnong marjan.
“Ka district council kan sa buh ruh ïa ki khyrdop ban peitngor ïaka rung ka mih ki briew ha Ïewduh bad kan ym shah shuh ïa ki ba ju sah miet ne kiba pyndonkam jaka sah ïaki dukan ha Ïewduh” la ong u CEM ka KHADC. Na ka liang ka Committee on Safety Security and Cleanliness of Ïewduh jong ka KHADC, shen kan sa pynlong ruh ïa ka jingtalasi ïaki dukan die kyiad beaiñ bad ïa ki jaka khalai ha Ïewduh.
