SHILLONG:
U MDC ka Sohryngkham Konstitwensi na ka seng National People’s Party (NPP), u Bah Pynïaid Sing Syiem, ha ka 20 tarik Jylliew u la shah jied kum u Chief Executive Member (CEM) ba thymmai ka Khasi Hills Autonomous District Council (KHADC).
Ka elekshon jied CEM thymmai ka la long hynne ka sngi ha kaba u shongknor ka KHADC, u Bah Lamphrang Blah u la pynbna ïa ka kyrteng jong u Bah Pynïaid Sing kum u CEM ba thymmai ka council namar ym shym la don u ba wan shakhmat ban thep kyrteng na bynta kane ka shuki.
Ha kane ka sngi, la pynkup burom ïa u CEM ba thymmai da kiwei pat ki MDC.
Lah ban kdew hangne ba u nongïalam ka seng United Democratic Party (UDP), u Bah Titosstarwell Chyne u la rem noh ha ka sngi sdang jong ka dorbar lyïur ha KHADC kata ha ka 19 tarik Jylliew ryngkat ka Executive Committee jong u kaba la khyllem noh hadien ba ki la rem ha ka no-confidence motion ba la pynkhih da u MDC ka NPP, u Bah Bajop Pyngrope.
