MAWKYRWAT:
Ka South West Khasi Hills District Swimming Association kum shi bynta ban pdiang sngewbha ïa u snem thymmai kumjuh ruh ban burom ïa ka mei mariang ban nym pynjakhlia ïa ki um ki wah kum ka jingbret pathar ïa ki plastik bad kiwei kiwei ha ka 31 tarik u Nohprah 2023 ka la pynlong ïa ka jingïajngi miet ha ka por 11: 45 PM ha Phot Mawpon, Mawkyrwat South West Khasi Hills District.
Ha kane ka jingïajngi miet la ïalam da u Bah H. S. Diengdoh u President jong ka SWKHDSA ha kaba la wan ban ïashim bynta haduh 18 ngut ki samla kynthei bad shynrang bad la ïoh ruh ban ot ïa u cake jong u snem Thymmai bad jingdwai.
Ha kajuh ka por ka seng ka ai khublei snem thymmai basuk bakmen da kaba kitbok kitrwiang bad ka jingkyrkhu kyrdoh ïa ki 27 ngut ki nongjngi napoh ka South West Khasi Hills District ki ban sa leit ia shim bynta ha ka Meghalaya Games ka ban sa long shen ha u ne u snem 2024.
