TURA:
U Myntri Rangbah Conrad K Sangma ha ka 4 tarik Jylliew u la shong ïa ka jingïalang bad ki 18 tylli ki sengbhalang nalor ki riew paidbah ha ka jingïalang kaba la pynlong ha Tura, West Garo Hills.
Ka jingthmu jong katei ka jingïalang ka long ban pynshai bad ïoh jingshai shuh shuh haba ïadei bad ka Reservation Roster.
Ha katei ka jingialang la wan ban donlang ruh naduh u Symbud Myntri Rangbah Bah Prestone Tynsong, nangta ka Myntri Sorkar, Dr. Ampareen Lyngdoh, Chief Secretary Bah DP Wahlang bad ruh u Bah HM Shangpliang MLA barim bad kiwei kiwei nalor ki kynhun bad ki seng ba paw na rilum Garo kynthup naduh u Augustine Marak na ka GNC bad kiwei kiwei.
Ki nongwan shim bynta ha katei ka jingïalang ki ioh ruh ban pan jingshai shuh shuh haba ïadei bad ka Reservation Roster bad ruh ban pyntikna ïa baroh ki nongshim bynta ba kin sngewthuh shai ïa ka bad ka jingmut jong ka.
Hadien ka jingïalang u Myntri Rangbah haba kren bad ki lad pathai khubor u la ong, “Ha ka jingialang mynta ka sngi nalor ki Myntri Sorkar bad ruh u Chief Secretary bad ki ophisar ki la don kumba 18 tylli ki seng bad ki kynhun bapher bapher kiba la khot ban shim bynta ha kane ka jingïalang. Ka jingthmu jong kane ka jingialang ka long ban pynsngewthuh bad pynshai kdar halor ka Roster System bad kumno ka treikam. Kumta hadien ba ki la ïohi ia ka presentation, ki la mih bun ki jingkylli bad bun na ki la dep ban pynshai bad jubab bad bun ki dkhot ki la hun bad pdiang ïa ka. Kumta, ngin sa shong biang ha ka kynhun Myntri ban pynïaid ïa ka kam shakhmat haba iadei bad ka Roster.”
