SHILLONG:
U nongaiktien ka Voice of the People Party (VPP), u Bah Batskhem Myrboh, u la ong ba ka VPP ka don jingtip bad ka sngewkhia ïa ki jingduna ha ki kam pynroi ha ki bynta bapher bapher jong ka jylla khamtam ha ki bynta jong ka pule puthi.
Katkum ka jingsngew jong u, ka resol ba dang shu pyllait shen da ka Meghalaya Board of School Education (MBOSE) ka pynpaw ïa ka jingbym sngewtynnad bad jinghiar ha ka jinglong jingman jong ka pule puthi ha Garo Hills ha kaba ka percentage jong ki khynnah ba pass ki duna bha ha ka jylla.
U la ong ba ka long kaba sngewsih ba ki sorkar naduh barim haduh ba thymmai kim shym la lah ban kyntiew ïa ka jinglong jingman ha ka pule puthi ha ka jylla baroh kawei bad kyrpang ha Garo Hills.
U Bah Bahskhem u la ong ba ka jinghiar ka pule puthi ha Garo Hills ka dei na ka daw ka jingshah ieh beiñ jong ki skul sorkar.
U la pynkynmaw ba ka Garo Hills ka shaniah tylli tyllon ha ka sorkar, khamtam ha ki bynta ba kham hapoh.
“Hynrei kane kam mut ba ka pule puthi ha ka thaiñ Khasi-Jaiñtia ka biang. Ka long ka jingshisha ba ka pule puthi ha baroh kawei ka jylla Meghalaya ka la hiar lane kam shym la lah ban ïaid ryngkat bad ka por. Kane ka shai na ka jingbym lah ki samla pule jong ngi ban ïakhun ha ka Ri,” la ong u nongaiktien ka VPP.
U la ong ba dei na kane ka daw ba ka VPP kumba la kdew ha ka mat treikam jong ka ha ka elekshon sha Ïingdorbar thawaiñ 2023 ka la skhem ban pynbha ïa ka jinglong ha ka pule puthi ha ka jylla ban tei ïa ka jinglah ki samla ban ïakhun ha ka Ri hi baroh kawei.
U la ong ruh ba ki nongshong shnong ka Meghalaya ki dei kiba la shah ktah ha ki nongïalam saiñ pyrthei kiba bamsap kiba ka jingbamsap jong ki ka saphriang ha baroh ki bynta bad ha baroh ki kyrdan ha ka sorkar.
U Marboh u la ong ruh ba ki dkhot jong ka political class ha ki saiñ pyrthei bapher bapher ki long kiba don kti ha ka jingduk ha ka roi ka par.
“Kaba sngewsih ka long ba kiba duk bad kiba shah ban beiñ jong ka jylla ki hap ban siew ïa ka dor jong ka jingbamsap, kam pher la ki dei na kano kano ka jaitbynriew. Ka jylla ka la sakhi ïa ka jingroi ki nongsaiñ pyrthei kiba riewspah haduh katta katta hynrei ka jylla bad ki paidbah ki duk. Ka jylla Meghalaya ka la ju long ka jylla kaba wan shadien ha ka Ri India. Wat ka High Court jong ka Meghalaya ka la ju kren na ka por sha ka por halor ka jingbamsap jong ki political class,” u la ong.
Ka VPP ka ong ba ki jingthmu jong ka seng ka long ban ai ka synshar khaddar kaba skhem kaba hapoh ka jingïalam ki nongmihkhmat ki ba biang kin kyntiew ïa ka jylla baieid shakliar na bynta ka lawei ba bha jong uwei pa uwei u briew ka jylla.
U Bah Batskhem u la wer ïa ki paidbah ka Garo Hills ban ïasnoh kti lang bad ka seng VPP ha ka jingpyrshang ban wanrah jingkylla ha ka saiñ pyrthei jong ka jylla Meghalaya ha kaba ki nongïalam saiñ pyrthei kin don ka jingkitkhlieh ïa ki paidbah bad kin trei da ka hok na bynta ka bha ka miat jong ki riew paidbah.
