SHILLONG:
U myntri rangbah ka jylla, u Conrad Sangma mynta ka sngi u la ïoh ban ïaphylliew jingmut bad ki nongsengkam kiba la ïoh bai seng na ka skhim sorkar kaba ai kyrteng ka ‘Chief Minister’s E-Championship Challenge and students of our Entrepreneurship Development Program for Colleges’. Ïa kane ka jingïamir jingmut la pynlong ha ka lympung ‘PRIME HUB’, ha nongbah Shillong.
Haba u la ïohi ïa ka jingseisoh jong kane ka skhim, u myntri rangbah u la ïoh mynsiem bad u la kut jingmut ba un thaw shuh shuh ïa kum kine ki lympung ‘PRIME HUB’, sa kumba 10 tylli na ka bynta ki khun samla bad kiwei de ki briew kiba na ka jylla, kiba donkam ïa ki lad ki lynti ha kaba ïadei bad ka jingseng ïa ki kam lajong, la ka long ka dukan die tiar, ne ki karkhana shna jingshna ne ki dukan shet bam.
“Nga la sngewkmen shikatdei eh ban ïohsngew ïa ka jingjop jong kine ki nongseng kam kiba la shim ïa ka kabu bad kiba la pyndonkam hok ïa ka jingïarap jong ka sorkar, bad mynta ki la lah ban trei shitrhem ha la ki jong ki kam kiba ki lah seng. Kine kiba don ïa ka sap ka phong ha kiba bun ki jingtrei ki la ïoh shisha ïa ka jingmyntoi kaba pura na ka skhim ba kyrpang ba la seng da ka sorkar MDA, ka ‘PRIME Entrepreneurship Meghalaya Program’,” la ïathuh u Conrad Sangma.
“Kane ka Entrepreneurship Development Program kaba dei ka skhim kaba thymmai; kaba lah mang khnang na ka bynta ki khynnah pule, kiba dang bteng ïa ka jingpule jong ki ha ki College, ka lah ïarap ïa kine ki khynnah bad kyrshan radbah ïa ki khamtam ba kin lah ban tih bniah ïa ki sap bad ïa kiba bun ki lad, kaba long kum ka jingsdang ïa ka lawei jong ka jingim jong ki,” la bynrap shuh shuh u Conrad.
“Mynta ngi lah plie sa ïa ka skhim ‘PRIME Image Video and the Product Catalogue’, kaba pyni ïa ka jingshakri jong kine ki nongsengkam bad ïa ki mar jong ki, lyngba ki dur bad ki video. Ngi lah pynmih sa ïa ka ‘Pragya Edu School ERP System’, jong uwei u nongsengkam lajong uba na ka jylla, uba la ïoh jingmyntoi na ka ‘PRIME Program’, u Omprakash Yadav, uba dei u nongshem ïa ka ‘ïewduh Techz Private Limited’.
Ka jylla Meghalaya mynta ka lah long kaba nyngkong ha ka jingbun ki nongseng kam lajong ha ka ri India. Ngin dang ïai kyrshan shuh shuh ïa ki jingthmu bad ki jingthrang jong kine ki nongsengkam lajong,” la batai shuh shuh u Conrad.
