SHILLONG:
U Myntri ka tnad pynroi nongkyndong u Bah Hamletson Dohling u la ong ba ka sorkar jylla ka la pynlut jin T.1600 klur ha ka shi snem na ka pla ka jylla ha ka jingtrei ka skhim 100 sngi ne ka National Rural Employment Guarantee Scheme (NREGS). Mynta ka sngi, u Bah Hamletson u la plie ïa u maw nongrim ban shna thymmai ïa ka ophis ka Laitkroh-Khatarshnong C&RD Block ha Mawkdok ha ka jingdon lang u Bah Gavin M Mylliemngap, u MLA ka Sohra, u Secretary ka tnat C&RD u Bah Tableland Lyngwa, u Director u S Sadhu, u BDO Bah PS Tynsong bad kiwei.
“Ïa ka skhim shispah sngi ngi la lah ban pyntrei bha ïa ka ha kane ka jylla. Mynshwa ka jingpynlut ïa ka shispah sngi ka long tang 3-4 spah klur hynrei ha snem 2020-22, la lah ban pynlut 1600 klur tyngka”, la ong u Bah Hamletson.
U la ong ba ka sorkar ka ju pynkloi ban pyllait ïa ka pisa bai tiar hynrei ha kine ki khyndiat por ka kham slem khyndiat ba don ka jingpynkylla ïa ka rukom treikam. Mynta ruh la pyllait 130 klur tyngka na ka bhah ka jylla ïa ka bai tiar bad namar ba la pynkiew ïa ka bhah ka jylla sha ka 75 percent, la pan biang sa 300 klur tyngka na ka ministry ïa ka jylla.
Ha kajuh ka por, u Bah Hamletson u la ong ba man ba u leit sha nongkyndong, u la ïoh ïa ka jingud jong ki ophisar ba ka ophis ka Block kam long shuh bad ka donkam ban pynbha. Dei halor kane, ba u la ïakren ïa u Myntri Rangbah u Conrad K Sangma ha kaba la rai ban mang pisa T.120 klur ban shna ïa ki 40 tylli ki C&RD Block ha ka jylla. “Nga la rah sha u Myntri Rangbah ba ki ophis BDO kim long shuh sha kylleng ki jaka bad la rai ban shna noh ka ïing ba thymmai, bad la mang pisa 120 klur ban shna ïa 40 tylli ki Block ha ka jylla”, la ong u Bah Hamletson.
U la ong ba la khot tender ban shna bad la dep aiti ruh ïa ki katto katne ki Block bad yn khot tender sa ïa kiwei ki bym pat khot ban sdang noh ïa ka kam.
“Ka ophis u BDO ka dei kaba ïajan bha bad ki paidbah ka jylla bad ka ophis ka Block ka dei ka jingkieng ban pynïadei ïaki paidbah bad ka sorkar, bad ngeit skhem ba ka ophis thymmai kan pynlah ban trei ar shah lai shah ïa kaba long mynta”, la ong u Myntri ka tnad nongkyndong.
Ha kane ka sngi, u la ong ruh ba ki don 80 tylli ki Village Organisation (VO) bad 700 eiei ki Self Help Group (SHG) ha Laitkroh-Khatarshnong Block hynrei mynshwa ki don tang da ki spah tylli eiei. “Mynta ngi don 42 hajar tylli ki SHG ha ka jylla bad ki 4043 tylli VO ha ka jylla”, la ong u Myntri.
Shwa ïa kane, u MLA ka thaiñ u Bah Gavin M Mylliemngap u la ong ba ki ophis Block ki wanrah ïa ka jingïajan ban pyntreikam ïa ki skhim bapher bapher sha nongkyndong.
“La ju ïohi ba ki Block ki don ïa ka bynta ba khraw ban pyllait ïa ka pisa da ki spah klur ban kyntiew ïa ki kam pynroi ha nongkyndong hynrei kaba sngew phylla ka long ba kim don ka pisa ban pynbha ne maramot ïa ka ophis lajong”, la ong u Bah Gavin.
Ha kane ka sorkar jylla MDA, khmih lynti ba ynda la dep ban shna, kan long ka jingmyntoi ïa ki paidbah ka thaiñ bad u la kyntu ïa ka tnat ba kan peit ba ka jingtrei kan long kaba bha, ban biang ka bording, ka um, ba kin peit bha ba ka jingtei kan long kaba paka, ryngkat ki jingdonkam katkum ka juk mynta.
