NONGSTOIN:
Kum shi bynta ban ai mynsiem bad ban nang kyntiew ïa ka jaka pule kaba don hapoh ka shnong Pyndengrei, u MLA ka Nongstoiñ u bah Macmillan Byrsat u la noh jingïarap haduh 4 lak shiteng ïa ka Anthony’s Memorial Secondary School Pyndengrei kaba dei ruh ka skul kaba don hapohg ka shnong jong u hi.
Ïa kane la sakhi ha ka janmiet jong ka 11 tarik u Naiwieng ha ka jingïalang kaba lyngkot kaba la long hapoh ka phyllaw jong katei ka skul ha kaba la ïoh ruh ban aiti ïa ka work order sha u nongseng jong katei ka skul da ki samla ka NPYF Pyndengrei.
U bah M. Marweiñ Sordar ka shnong Pyndengrei haba ai jingkren kum u kongsan u la ai ka jingïaroh ïa ka kur Nongsiang bad khamtam ïa u bah E.D Nongsiang u ba la ïohi jngai ban seng ïa katei ka skul kaba la ai jingmyntoi ïa ka shnong ka thaw khamtam ïa ki khynnah kiba wan na ka ïing ka sem kaba duna ka ïoh ka kot.
Shuh shuh u la ia khublei kyrpang ruh ïa u MLA ka Nongstoiñ u bah Macmillan Byrsta u bala kloi ban noh jingïarap ïa katei ka skul haduh T. 4.5 lak bad u la ong ruh ba ka jingïoh ïa u MLA u ba dei u trai shnong kala long jingkyrkhu kaba khraw ïa ka shnong Pyndengrei ha kaba tang ha kine ki 4 snem tam shibun ki skhim pynroi kila tuid la ka long ha ka pule puthi, ka um bam umdih, ka surok ki lynti siengkien bad kiwei kiwei.
Katba na ka liang jong u bah E.D Nongsiang u nongseng jong katei ka skul haba ai jingkren u la pynpaw ïa ka jingkmen kaba khraw hadien ba u la ïoh khubor ba u MLA un ai jingïarap biang ïa ka skul kaba dang donkam shibun ki lad jingïarap.
“Manba ngi ïoh jingïarap na ki MLA ne MDC kam ju palat ïa ka 2 lak tyngka hynrei mynta ka kynti lyngba u MLA u bah Macmillan Byrsat ngi la ïoh pdiang syndon haduh 4.5 lak bad nga da sngewnguh eh ïa u MLA u bala pyrkhat kyrpang ïa kane ka skul jong ngi” ong u bah E.D Nongsiang.
U bah Nongsiang u la ong ruh ba lyngba ka jinglong MLA u bah Macmillan Byrsat shibun ki kam ki paidbah ka shnong Pyndengrei bad ka Nonhstoiñ Constituency hi baroh kawei kila sakhi bad kine hi ki kam shisien ka sngi kin sa kren briew ynda la dei kapor.
Ha kane ka jingïalang aiti work order la ïadonryngkat lang ruh u bah M. Marweiñ Sordar ka shnong Pynden grei kum u Kongsan, u bah E.D Nongsiang u badei u nongseng ïa katei ka skul, u bah D. Nongsiang Headm aster jong ka skul, u Samla Kynsaibor Kharbani President NPYF Pyndengrei, u Samla Mickey M Marwein bad kiwei kiwei.
