SHILLONG:
Kum shibynta ban ai ka kti ka mon ka kti ka diang ïa kiba haïing jong ki briew ki ba la ngat ha ka jingshah pynïap ha ki pulit Assam, ka All India Trinamool Congress (AITC) kan ai jingïarap pisa T.5 lak sha kiba haïing kiba khlad bad kumjuh ruh kan ai jingïarap pisa ïa ki briew ki ba mynsaw ha kane ka jingjai .
U Dr Mukul Sangma u nongïalam ka liang pyrshah u la ïathuh ba hynnin ka sngi u la ïoh ban leit ban hiar hi sha ka shnong Mukroh ban ïa kynduh ïa ki bahaïing jong ki briew ki ba la shah pynïap dusman ha ki pulit Assam .
“Na ka liang jong nga bad kumjuh ka AITC ka phah ïa ka jingsngewlem ïa ki briew ki ba la duh ïa la ka jingim bad kumjuh ïa ki briew ki ba la ngat ha ka jingmynsaw na ka ne ka jingjia”, u la ong.
U Dr Sangma u la ong “Na ka liang ka AITC, ngin ai ka jingïarap pisa ïa ki bahaïing jong ki ba khlad ka ba long T.5 lak bad ruh kan ai ka jingkyrshan ïa kito ki ba la mynsaw na kane ka jingjia”.
“Kine ki ba mynsaw mynta ki don hapdeng ka jingshitom kaba jur bad donkam ban phah sumar ïa ki ha NEIGRIMHS Hospital katkum ka jingong u doktor hynnin ka sngi, ha ka por ba u leit peit ïa ki ha hospital”.
