SHILLONG, 31 Lber (KJS): Ka Iingbishar High Court, Meghalaya mynta ka sngi ka la takraiñ ïa ka sorkar jylla hadien ba ka la phiel ban peit ïa ki kali kiba kit palat pud wat hadien ba la dep ban bthah ïa ki Superintendent of Police (SPs) ban tehlakam ïa kane.
“Ka sorkar ka la ong ba ka la pynkhreh ïa ka Blueprint bad ka donkam ban buh ïa ki tiar ban thew ïa ka jingkitkhia ha kaba ka jinglut kan long kumba T.27 lak. Hynrei haba shim ïa ka jinglut ban shna surok shi kilometer, ha kane ka jylla kaba long lum bad kaba jur slap bha haduh hynriew bnai lynter, ym lah ban ai jem khlem da pyrkhing ïa kane ka jingeh”, la ong ka Division Bench ha ka hukum halor ka PIL ba la ujor u Tennydard M. Marak.
La bthah ruh ba ki Superintendents of Police (SPs) ha barohk ki District ki hap ban husiar bad la bthah ban peit ïa ka jingkit palat pud ki trok. Ka la mana ban kit khlem da tap, lada ki dang pyrshah, kiwe kin hap hapoh ka aiñ.
Sngewsih pat ba ki khlem peit halor ki trok kiba kit palat pud bad ka la bthah ïa ka sorkar jylla ba kan ai ka kaiphod hashwa ka 3 tarik u Jymmang.
Ka la ong ruh watla hadien ba la dep bthah hynrei la shu leh tang dep ban talasi ïa kiba kit palat bad kam don kano kano ka jingshim khia.
Ha ka kaiphod kaba la dep la pyni ba don 16 tylli ki Weighbridge kiba treikam hapoh ka jylla bad ha kaba kut jong une u bnai, ka jingbun ban pyntreikam ïa kine ki Weighbridge kan sa kiew.
Ka jylla ka la phah ba 19 tylli ki weighbridges ki treikam bad sa 4 tylli ki dang dep shna hapoh kine ki taiew lane 14 sngi ban wan.
Ha kajuh ka por, ka Kashari ka la ong ba dei ban buh ruh ïa ki Weighbridge ha ki bynta bapher bapher ka jylla, kum ha Pynursla, Shella, Dawki bad Nongstoin, ki kali kiba kit ïa ki mawthup bad ki shyiap sha rud wah bad kiwei ki tiar bakhia ki khlem shah talasi satia.
Ka High Court ka la ong ba la ïohi ba ki kali wat khlem ki number plate ruh ki ïaid sahuh katba kiba dei peit ki khlem leh eiei.
“Ki don ki jaka kum ha ki thaiñ Pynursla, da ki hajar ki trok la ïohi ba ki la ieng ryngkat ki mawthup ban leit pynhap sha Bangladesh, kiba khlem bud ïa ki kyndon ïa ka jingthew ha ka jingkit. Hynrei ki don ruh kiba kit dieng palat ïa ka jingthew. Ka la don ka jingpynbha ban shu tap ïa ki kali ba kit hynrei kane ruh lehse kan dei pynban ka buit ban buhrieh ïa u dewïong ha jaka ban peit ba kan don ka jingshngaiñ.
“Ka dei kaba shisha ba ka jingkit ïa ki mawthup ka don ka jingma lada ki lada kum sangeh kynsan, kylla ha surok, kan buh jingma ïa ki kali nadien bad ïa ki nongïaid nongïeng”, la ong ka Kashari.
