SHILLONG:
Ka jingther u lapbah ha une u bnai Jylliew ha kylleng ka jylla Meghalaya ka la long ka jingkmen bad ha kajuh ka por ka jingsngewsih, namar ka jingkmen ïa ki paidbah khamtam namar ba ka Wah Umiam ka la khie im pat sa shisien hadien ba ka la ringsdot na ka jingtyrkhong bad shit kyrang ka mariang bad ka jingsngewsih pat ïa kito kiba shah ktah ha ka bor mariang namar ka jingther jong u lapbah kaba la wanrah ïa bun ki jingjulor bad wat ban wanrah ïa ka jingïap jong ki briew ruh.
Ka Executive Director jong ka State Disaster Management Authority, ka Kong Matsiewdor War Nongbri ka la pyntip ba tang hapoh une u bnai Jylliew, kata naduh ka 1 tarik haduh 28 tarik, ki don haduh 13,000 ngut ki briew bad 199 tylli ki shnong kiba la shah ktah ha ka jingpynjulor ka bor mariang namar ka jingther jong u lapbah bad ki dang don sa ar ngut ki briew kiba jah bympat lap haduh mynta.
Haba kren bad ki nongthoh khubor mynta ka 30 tarik Jylliew, ka Kong Matsiewdor ka la ong, “Kumba ka long naduh ka 1 tarik haduh ka 28 tarik u Jylliew, ki don haduh 199 tylli ki shnong kiba shah ktah, 13682 ki briew kiba shah ktah bad ki don sa ar ngut ki briew ki bym pat lap haduh mynta bad hynniew ngut kiba mynsaw”. Ka la ïathuh ruh ba ki don hynniew tylli ki mrad kiba ïap na kane ka jingshah pynjulor na ka jingther jong u lapbah bad ki don haduh 138 tylli ki iing kiba la shah pynjulor, kiba shah pynjulor malu mala ki don haduh 182 tylli, bad kiba la julor bun ki don 22 bad kiba la ïoh jingïarap ki don 31 tylli bad baroh ki don haduh 373 tylli.
Ka Kong Matsiewdor ka la ïathuh ruh ba ki don ar ngut ki briew na Mawdon bad Mawkhan kiba la ïap namar ka jingshah tied pyrthat bad ki jingri jingdup ruh ki don kiba shah tied ha u pyrthat.
Kane ka jingkheiñ ka lah ban nangkiew namar katkum ka jingïathuh ka Kong Matsiewdor ka la ong ba kin dang don shuh shuh ki kaiphod kiban wan na ki district bapher bapher ha ki sngi ki ban wan bad kumba ka long mynta hi, kane ka tnad ka ïohpdiang ïa ki kaiphod arsien ha ka shi sngi, ha ka por mynstep bad janmiet.
