SHILLONG:
U Nongïalam jong ka seng saiñ pyrthei ka ‘Voice of the People Party’ u Bah Adelbert Nongrum u la ther tyngeh ïa ki nongïalam sengbhalang bad ki nongïalam jong ka seng kieng atiar kiba la ïoh ka lad ban rung hapoh Secretariat hynrei ki klet ïa la kajong ka deiti bad ïa la ka jong ka kamram.
U ne u nongïalam haba kren ha ka jingïalang dawa pynbeit ïa ka bhah thung kam thung jam ha ka jylla u la ong ba u ai ka jingïaroh ïa ka jinglong tylli jong ki paralok Garo kiba dei ka nuksa na ka bynta jong ngi, hynrei ka daw ka jong ngi ka dei ba ngim ïa tylli.
“Ngi don ka nongrim bad kata ka dei ka bor jong ki paidbah ka jylla, kane kam dei ba ngi dawa be-aiñ hynrei ka dei kaba shong hok, shnong nia bad kadei kaba dei hok ka jong ngi,” u la ong.
U Bah Adelbert u la ong, “Ka hok kam don shuh ha kine ki 51 tylli ki snem, na kata ka daw ngi donkam ban pynkylla ïa ka State Reservation Policy namar kumba ka long mynta kam ai bad kam pynbiang ïa kata ka jingdonkam.”
U la ong ruh ba kane ka reservation policy kam dei ka jingkwah jong ka VPP, kam dei ka jingkwah jong ka jylla, kam dei ka jingkwah jong ki khun samla, hynrei ka dei ka jingdonkam.
“Lashai lada ki khun samla ki ngop ha u drok, ka kiad, u kynja bad lada ki samla ki rah suloi, ki rah bom, ki rah AK 47 ïano ngin kynnoh? Ïa kane ka Sorkar MDA- II namar ka la ïa pein ïa ka jaitbynriew, ïa ka lawei jong ki samla tang bad ka shuki, “ u la ong.
Une u nongïalam u la ong ruh ba lada ka Sorkar MDA ka kwah ïa ka burom shim ma phi ïa ka, tangba pyntikna tang ka wei ba kim dei ban lehkai ïa ka jingim jong ki samla bad wat lehkai ïa ka lawei ka jong ki.
“Kita kiba dei ki sengbhalang, kiba dei ki nongïalam jong ki sengbhalang, ki nongïalam jong ki seng lehnnoh, tang shu ïoh ka lad ban rung hapoh Secretariat ki klet ïa la ka jong ka deiti, ïa la kajong ka kamram, ïa laka jong ka jingkitkhlieh. Balei ki pynlong ïa ki jingïakhih, ha ki 51 tylli ki snem kiba la leitnoh,” u la buh jingkylli.
U la bynrap da kaba ong, “Kine baroh ka dei tang ban paw nam ïa ki, ki pynlong dieng shaiñ doh kylla ïa ki dkhot jong ka jaitbynriew, katno ngut kiba la shah tied shah shoh, shah siat, kiba khrew haduh mynta, hynrei kine ki hun.”
Shuh shuh une u nongïalam ka VPP u ba dei ruh u MLA jong ka North Shillong u la ong, ki don kiba kynthoh ba kat ki nongïalam ki leit sha surok, hynnrei kam pher la ki dei ki MLA namar dei u Paidbah u ba ai ïa kane ka kyrdan, bad ba ki pyrkhat ïa ka status jong ka jaitbynriew.
U la ong ruh ba u don ka jingkyrmen ba kim lah ban kyntait hynrei ki lah ban pynjlan, hynrei kum ki MLA kin ïai ïakhih la ka dei hapoh ka iingdorbar thawaiñ ne ha surok ban pyntikna ba kane ka jngdawa kan poi sha ka thong.
