SHILLONG:
Hadien ba na ka liang ka tnad Tourism ka la pynban ban pynlong ïa ka Beach Festival myn ha ka 19 bad 20 Tarik Kyllalyngkot 2024 ha Ranikor, na ka liang ka Khasi Student Union (KSU) Ranikor Circle, ka la buh da jingkylli sha ka Sorkar jylla halor ka jingshngaiñ ka wah Kynshi.
Haba kren sha ki lad pathai khubor myn ha ka 17 tarik Kyllalyngkot 2024, ha Shillong Press Club, u President ka KSU Ranikor Circle u Bah Marconi Thongni u la ong ba wat la na ka liang ka seng kam kwah ban pyrshah ïa kano kano ka tamasa kaba ka sorkar ka thmu ban pynlong hynrei ka wah Kynshi ka la dei kawei na ki wah kiba la jaboh bha haduh ba kam don shuh tang ki dohum ruh ki ba lah ban im ha ka.
U la ong, “Ngi ïohi ïa ka jingjaboh kane ka wah kaba la kylla sha ka rong jyrngam bad na ka liang ka seng ha ki snem ba la leit ka la kyntu ïa ka sorkar ba ka dei ban test ïa ka um jong ka Wah Kynshi ban tip la ka dang long ne em ka ba shngaiñ ban pyn donkam.”
“Hynrei na ka liang ka Sorkar ka la shu phah tang ïa ka Pollution Control Board ban wan test ïa kane ka wah bad haduh mynta khlem da ai ïa ka kaiphot,” u la bynrap.
U bah Thongni u la ïathuh ba na ka liang ka Seng ka don ïa ka jingsuba ruh ba na ka jingjaboh kane ka um ka pynlong ïa ki ba bun ki longïing ha kane ka thaiñ ba kin ngat ha ka jingpang bampong.
“Ngim dei kita ki stad ban batai ba ka jingkynrei ka jingpang bampong ha kane ka thaiñ kan dei na ka wah Kynshi ne em hynrei haba ki briew ki ju bam ïa ki dohkha, ki shet jingshet ki sum da kane ka um kaba jaboh, ka pynsuba ba bun kiba ïohpang bampong,” u la bynrap.
U la ïathuh ba na ka liang ka Seng naduh u snem 2010 ka la kyntu ïa ki nongshong shnong kane ka thaiñ ba kim dei ban pyndonkam ïa kane ka wah bad kane ka long hadien ka jingïap khah khah ki dohkha ha kane ka wah.
“Kum ba ka long mynta lei kane ka wah kam don shuh ki doh um ki ban lah ban im ha kane ka wah bad ka um ka la kylla rong jyrngam kumta ka seng ka kyntu ïa ka sorkar ba ka dei ban leh ïa ka test ban pynthikna la ka wah Kynshi ka dang long ne em ban pyndonkam,” u la ong.
U la ong ba ka Seng kam pyrshah ïa ka jingthmu jong ka Sorkar ban pynlong ïa ka tamasa hynrei ka seng kam kwah pat ban buhrieh ïa ka jinglong jingman ka wah Kynshi namar kiba nabar kim tip ïa ka jingshish. Ka KSU ka la buh ruh ka jingkyntu ïa ka Sorkar ba kumba ka shimkhia ban theh pisa ban pynlong tamasa kumta kan shim khia ruh ban pynbha noh ïa ki surok sha kine ki thaiñ.
