SHILLONG:
U MDC ka Sohryngkham Konstitwensi u ba dang shah jied thymmai kum u Chief Executive Member (CEM) ka Khasi Hills Autonomous District Council, u Bah Pynïaid Sing syiem, haba ai jingkren ha ka sngi ba-ar jong ka dorbar lyïur u la pynpaw ba u kwah ban ai jingpynshai ba u sngew duh mynsiem ban ïohsngew ïa ka jingong ba ym lah ban shaniah ïano ïano ha ka Executive Committee (EC).
Ban pynshong nia halor kane, na ka liang u Bah Pynïaid Sing u la ong, “Nga pat nga ong naduh mynta ka sngi phin tip ba nga shaniah 100 per cen ïa ka EC, namar lada ym don jingïa shaniah, kan ym ïaid ka kam.”
Katba u Bah Pynïaid u dang kren ïa kitei ki kyntien, la sakhi ïa ka jingthap miej kum ka dak ka jingsngew mynjur na kiwei pat ki MDC kiba ai jingkyrshan ïa u Bah Pynïaid Sing.
Na ka liang u Bah Pynïaid u la ong ba khlem jingartatien u ngeit skhem ba ka EC jong u ka lah ban leh bha na bynta ban kyntiew ïa ka ri bad ka jaitbynriew. U la ong ba ki don ki dkhot ki ba la long rangbah kiba lah ban noh-synñiang shibun haba ïadei bad ka synshar khaddar.
U Bah Pynïaid u la ong ruh ba u nud ban kob ba kin ai ka jingïatreilang, khlem da peit ïa ka jingdon jong ki seng saiñ pyrthei. U la ong ba u kwah ban pashat ba ka council hi ka dei ka synshar khaddar, bad ym pat ju don ka constitution ha ka 6th Schedule ban thoh ba tang kawei ka seng ka lah ban synshar ha ka District Council.
U Bah Pynïaid Sing Syiem u la ong, “Nga ïohi ba ha ki snem kiba la leit, ki bun bah ki bills kiba donkam bha hapoh ka council ka jong ngi hynrei sngewsih ban ong ba tang shu poi ha Secretariat, ki bill ki jong ngi ki kylla kot jot namar ba ym don ba peit shuh ïa ki bill jong ngi, da ki snem ki bnai lah shu buh sha kyndong”.
