SHILLONG:
Ka Khasi Student’s Union (KSU) South Central East Circle, Pynursla ka la kyntu ïa u Bah Prestone Tynsong MLA ka Pynursla bad Symbud Myntri Rangbah ka Jylla Meghalaya ba dei peit ïa ka tnad PWD (Roads) bad kumjuh ïa ki bor ba dei peit ïa ka jingpyntrei ïa ka surok Shillong -Dawki kum ka NHIDCL bad ki ophisar ba kim dei ban jrong tang u thylliej katba ki kam pat ym poi shaei shaei ruh.
Kane ka jingkren ka seng ka long haba kynthoh ïa ka jingpynslem ban pyntrei ïa ka bynta ka surok narum Laitlyngkot sha Dawki bad kaba la nang pynsohsat ïa ki paidbah ba ïaid ba ïeng ha katei ka surok namar ka jingsniew jong ka.
“Ka jinglong jingman ka surok ka wanrah ka jingsngew diaw bad hap ban pynrem jur ïa ka Sorkar Jylla bad ki bor ba dei khmih namar ka jingsuki ban pyntrei ïa kane surok”, la ong u samla Vorrozislov Sohkhlet, Assistant General Secretary ka seng ha ki lad pathai khubor hadien ka jingwan jurip ïa katei ka surok lem ki dkhot ha ka 16 tarik u Nohprah, 2022.
Da kaba pynpaw ba katkum ka jingïoh jingtip ban maramot ïa kane ka surok la mang san klur tyngka tam eiei, u la ong ba haduh mynta ym don dak don shin satia. “Ki paidbah ki sngewkhia bad mad jingeh haba ïaid ba ïeng na kane ka surok khamtam kiba pang ba shitom bad long kumba shah leh beiñ ïa ki kali bad haduh ba ki kali kamai ki kyntiew ïa ka dor bai kali tang na ka jinglong jingman ka surok”, u la ong.
U la ong ba ka NHIDCL ka suki palat ban pyntreikam bad naduh ki bnai Ïaiong bad Jymmang mynta u snem ka seng ka la ïakren bad ka ophis SDO ka Pynursla Sub-Division kumjuh ïa ki bor katei ka Company ban pynsngew ïa kane ka jingeh pynban kam mih soh eiei haduh mynta.
“Ka NHIDCL ka la kular ba ha u bnai Risaw kan ïakynduh ïa ngi bad kiwei pat kiba ïa don bynta ban pynbha ïa kane surok hynrei kaba lyngngoh ka long ba don tang 5 haduh 10 ngut ki nongtrei jong ka”, u la ong da kaba kynthoh ba katkum ka jingtip la buh ban pyndep trei ïa ka surok ha ka 26 tarik u Nohprah, 2022 hynrei ka long thamula ba bun pat tang ki thliew ha shi lynter ka surok bad kam shngain ban ïaid ban ïeng.
Da kaba kynnoh ba ym kiba shong shuki kiba mad sohsat hynrei u paidbah, u la ong ba ki ophisar PWD ki ong ba la aiti sha ka NHIDCL hynrei mynta la bun bnai pat ym leh eiei bad haba kumne ïano yn kynnoh bad ka Sorkar ka la dei ban aiti sha kiwei ki Company ban pyntrei.
Haba kylli la ka seng ka la ïakren bad u MLA ka thaiñ namar u dei u Symbud Myntri Rangbah ba dei peit ïa ka tnad PWD, ka seng ka la ong ba naduh ki bnai Lber bad Ïaiong ha ka por ba duh thoh eksam ki khynnah na ka jinglong jingman ka surok la ïakren bad u Bah Prestone uba la kular pynkloi.
“Hynrei kaba lyngngoh ba na ka liang jongno jongno ruh ki jrong tang u thylliej bad lyngkot ki kti ki kjat hynrei ha ka jingshisha la dei ban pynjrong ki kti ki kjat ban pyntyllun ïa ka kam bad ba ki paidbah kin nym shah shukor ne shah leh beiñ ha kum ka jinglong jingman ba mynta kane ka surok”, la ong u samla Vorrozislov uba la ong ba ka pynpaw ka jingbym shimkhia u MLA jong ki.
U Rangbah Shnong ka Wahkdait, Bah Fastborn Dkhar u la ong ba ha ka por ba sdang pyntrei ïa ka surok la julor lut ki jaka rep nalor ba ki trai jaka kim pat ioh ïa ka bai lutksan bad kumta ki pynsangeh. “Haduh mynta ka company kam trei eiei shuh bad ka jingsiew bai lutksan ïa ki nongrep ne trai jaka ruh ym pat ioh satia”, u la ong.
U la ong ba ka company ka la iehnoh ban trei ïa ka kam naduh Wahkdait shaduh Dawki. Haba kylli, u la ong ba ki trai jaka shabar ka ‘alignment’ jong ka surok kim pat ïoh jingsiew satia. “Ka jingrit ka surok ha katei ka thaiñ nalor ka jingsniew ka wanrah jingeh ïa ki paidbah bad donkam ban pynkloi ban shna ïa ka”, u la ong da ïathuh ba la sdang trei ïa ka surok naduh u snem 2019.
Da kaba pynpaw ba ki paidbah kim don jingpynthut, u la ong ka jingslem ka dei ka jingbym shimkhia ki bor bahalor halor kane surok la ka dei na ka Sorkar Jylla bad ka NHIDCL hi bad pynpaw ruh ka jingkyntu ïa ka Sorkar Jylla ban pynsted namar kumba long hi ka pynduh jingkyrmen ïa ki paidbah ka thaiñ.
Kum ban shu kdew ba ka mang tyngka na ka surok Shillong Dawki ba jrong 71 KM ka la poi palat ïa ka 1200 klur bad ka jingbei tyngka ka dei lyngba ka Japanese International Cooperation Agency (JICA).
